Kryeministri Edi Rama, njëherazi edhe Kryetar i PS-së, ka thirrur paraditen e sotme një takim me drejtuesit politik sipas qarqeve, ku janë diskutuar çështjet e organizimit.
Sikundër është raportuar, Rama i ka kërkuar drejtuesve politikë raporte të detajuara mbi gjithë problematikat, ndërsa u shpreh se në 25 prill, PS duhet të fitojë 74 mandate.
Ndërkohë, Sekretari i Përgjithshëm i PS-së, Taulant Balla, në një komunikim me mediat, tha se ky takim i përjavshëm do të vijojë deri më 25 prill.
“Ne kemi diskutuar sot mbi çështje të karakterit organizativ, padyshim edhe të një raportimi të një vlerësimi që kemi mbledhur nga qytetarët mbi cilësinë e shërbimeve publike.
I kemi dorëzuar kryeministrit një përmbledhje të vlerësimeve që burojnë nga qytetarët për cilësinë e shërbimeve publike, për përmirësimin e tyre. Kemi diskutuar dhe për krijimin e një kanali komunikimi virtual me anëtarësinë e partisë, për të vlerësuar performancën e çdo përfaqësuesi të PS. Ky kanal do të kontribuojë në përmirësimin e partisë”, tha ai.
Sa i përket largimit të ministrit Sandër Lleshaj nga roli drejtues politik i PS-së në Lezhë, Balla tha se ai ka bërë një punë të shkëlqyer dhe se kjo gjë nuk ka të bëjë me performancën.
“Së pari duhet të them që PS e Shqipërisë ka në mënyrë të vazhdueshme ka përzgjedhur dhe ka bërë ndryshime në drejtimin politik të qarqeve. Nuk dua të le asnjë ekuivok në përgjigje ndaj pyetjes tuaj, pasi gjithë ky ujë që zien kazani nuk ka të bëjë me perforacion e Lleshaj si drejtues politik. Ai është një ministër shumë i mirë dhe ka performuar shumë mirë në krye të ministrisë së Brendshme. Në Lezhë PS do të marrë 4 mandate”, tha Balla.
Në fakt sikundër është raportuar, shkak për largimin e Lleshajt si drejtues politik ishin konfliktet e krijuara me strukturat e PS-së në Mirditë, por edhe përplasjet që ai ka pasur me Kryebashkiakun Pjerin Ndreu.
Po ashtu Balla u pyet edhe në lidhje me largimin e Besa Shahinit nga qeveria, pyetje të cilës socialist i devijoi duke vlerësuar punën që është bërë në arsim në këto vite nga qeveria.
“PS ka bërë reformën më të thellë në sistemin arsimor shqiptar duke e depolitizuar procesin e emërimeve të ndyra në shkolla mësuesit shqiptarë sot janë më të qetë se kurrë. Aktualisht cdo mësues që rekrutohet sipas meritës. Shqipëria që duam është Shqipëria që nuk ka lidhje me emërime partie”, tha Balla.
