Ambasadorja e SHBA në Shqipëri, Yuri Kim, i është drejtuar me një letër drejtuesve të partive politike, Kryeministrit Edi Rama (PS), kreut demokrat Lulzim Basha dhe kryetares së LSI-së, Monika Kryemadhi, përsa i takon përzgjedhjes së kandidatëve për deputet.
Diplomatja amerikane u kërkon krerëve të partive politike që të mbajnë përgjegjësi për pastërtinë e figurës së kandidatëve të ardhshëm për deputetë.
Në letër thuhet se ajo inkurajon të gjithë partitë të kontrollojnë kandidatët dhe të përzgjedhin vetëm ata që janë të kualifikuar dhe respektojnë votuesit shqiptarë.
Më tej ambasadorja thekson se SHBA do të vazhdojë të luftojë korrupsionin dhe do të jetë përkrah atyre që luftojnë zyrtarët e korruptuar.
Në letrën e saj, Kim u kujton drejtuesve të partive politike edhe ligjin për dekriminalizimin.
Letra e diplomates amerikane vjen në një kohë kur PD ka nisur procesin e veirifikimit të emrave që janë propozuar, ndërsa kandidatët duhet të plotësojnë një formular me pyetje specifike, që përfshijnë detaje nga jeta e tyre, përgjatë 10 viteve të fundit.
Problemi lidhur me kandidatët për deputet apo kryebashkiak nisi kur Partia Socialiste kandidoi në 2013 një seri emrash që rezultonin me të shkuar kriminale, dhe pas një beteje jo të vogël, opozita e drejtuar nga PD, iu imponua mazhorancës së Kryeministrit Rama që të pranonte miratimin e ligjit për dekriminalizimin, që u pasua me ndërprerjen e mandateve të disa deputetëve dhe kryebashkiakëve.
