Pas zv.Kryeministrit Erion Braçe, edhe ish-ministri i Shëndetësisë, Ilir Beqaj, mendon se përhapja e rasteve me Covid-19 ka të bëjë me festat që organizohen në jug të vendit, në zonat turistike.
Në një postim në rrjetet sociale, Beqaj shprehet se beteja kryesore këtë javë me Covid-19 është në bregdetin e Jonit.
Ish-ministri thekson se në baret dhe klubet e natës po lejohet të ndodhin “plagosje me paramendim”.
“Babëzisë së pronarëve së atyre bizneseve për të fituar shumë e shpejt në kurriz të shëndetit të shqiptarëve duhet t’i përgjigjemi me forcën e ligjit. Karshillëku i administratorëve të atyre bizneseve për të shkelur ligjin meriton ndëshkimin shembullor”, shprehet Beqaj.
Ish-ministri shkruan se beach bar më beach bar dhe club më club, 24 orë në çdo ditë, duke filluar nga prototipët si Nazar e Folie Marine e të gjithë me radhë.
“Aty po lejohet të ndodhin “plagosje me paramendim”.
Aty po sakrifikohet sakrifica 5 mujore e personelit shëndetësor.
Aty po nëpërkëmben politikat mbështetëse ndaj grupeve më të dëmtuara nga pandemia.
Babëzisë së pronarëve së atyre bizneseve për të fituar shumë e shpejt në kurriz të shëndetit të shqiptarëve duhet t’i përgjigjemi me forcën e ligjit.
Karshillëku i administratorëve të atyre bizneseve për të shkelur ligjin meriton ndëshkimin shembullor.
Situatat e paqarta që kalojmë kërkojnë vendosmëri të leadershipit”, shkruan Beqaj.
