Në kushtet kur Qeveria dhe Komiteti Teknik po akuzohen nga ekspertë të shëndetit publik për mungesë strategjie në përballimin e pandemisë Covid-19, ministrja e Shëndetësisë Ogerta Manastirliu ka paralajmëruar vënien në funksion të spitalit të tretë ku do të trajtohen pacientët e prekur nga koronavirusi.
Në dy muajt e fundit ka pasur një shtim të rasteve me Covid-19, është rritur numri i të shtruarve, por edhe i personave që humbasin jetën, ndërsa bazuar në shifrat zyrtare, Shqipëria renditet ndër 10 vendet e para për numrin e të prekurve për 100 mijë banorë.
Gjatë inspektimit në spitalin e përshtatur COVID-3 (struktura e ish-kirurgjive në QSUT), Manastirliu ka bërë me dije se do të rekrutohet staf i ri mjekësor në QSUT dhe janë drejt përfundimit përgatitjet për hapjen e spitalit COVID-3, për t’u përgatitur për një fluks të mundshëm të shtimit të rasteve, që do të kërkojë edhe hapjen e spitaleve COVID-3 dhe COVID-4.
“Jemi duke u përgatitur për të patur burime njerëzore të nevojshme për strukturën e spitalit COVID-3, pra ish-kirurgjitë dhe për spitalin COVID-4 që është në aksin Tiranë-Durrës. Ka filluar rekrutimi dhe trajnimi i stafit. QSUT-së i janë shtuar 50 punonjës, një pjesë tashmë janë rekrutuar dhe një pjesë janë në rekrutim e sipër. Do të kryejnë dhe trajnimet e nevojshme dhe do të kombinohen me stafe të tjera me eksperiencë”, tha Manastirliu, gjatë inspektimit të spitalit COVID-3.
Rektori i Universitetit të Mjekësisë, Arben Gjata, anëtar i Komitetit Teknik, ka pohuar se kemi një plan të organizuar për përfshirjen që nga vullnetarët që kemi në listë, gjithashtu do të aktivizohen të gjithë stazhierët e disa specialiteteve, duke i kombinuar me mjekë me eksperiencë nga shërbime të tjera, në shërbimet për pacientët COVID.
Ministrja e Shëndetësisë deklaroi se po përgatitet plani i veprimit për vjeshtë-dimrin, bazuar mbi një strategji të qartë. “Kemi një strategji të detajuar në raport me situatën që presim, pra për situatën e vjeshtë-dimrit. Dhe plani i detajuar, parashikon disa komponentë të rëndësishëm dhe fuqizimin e tyre. Duke filluar nga testimi, duke vijuar nga kapacitetet spitalore, duke vazhduar tek burimet njerëzore, të cilat janë aseti ynë më i çmuar. Ndaj jemi duke mundësuar që skuadrat e mjekëve dhe infermierëve të jenë të gatshëm që në momentin që do të duhet, t’i kemi gati dhe të jenë të trajnuar”, tha Manastirliu.
