Nga BoldNews.al
Dy oficerë policie, të larguar nga detyra në vitin 2017 për përfshirje në çështje droge, janë rikthyer në detyrë dhe tashmë janë pjesë e një grupi që do të monitorojë rastet që mund të duken si korrupsion në sistemin e drejtësisë.
Oficerët Leonard Palushi dhe Bedri Hasanaj, së bashku me drejtues të tjerë të uniformave blu, janë ngarkuar nga Drejtori i Policisë së Qarkut, Arjan Muça, për të raportuar mbi vendimet e prokurorëve dhe gjyqtarëve që u duken si korruptive.
“Boldnews.al” ka siguruar, në mënyrë ekskluzive, mesazhin që drejtori Muça u ka dërguar vartësve të tij, në një grup në “Whatsapp”.
Është e paqartë koha e dërgimit të këtij mesazhi, por duket se është i kohëve të fundit, duke marrë në konsideratë se Arjan Muça është emëruar në vitin 2019 drejtues i Policisë së Elbasanit.
Në mesazhin e drejtorit të Policisë, të siguruar nga “Boldnews.al”, thuhet:
“Të nderuar shefa! Deri në orën 14 të ditës së sotme, duhet të dërgoni me shkrim në adresën e Leonard Palushit, problematikat që keni pasur me prokurorët dhe gjyqtarët, lidhur me vendime që ju i dyshoni si korruptive për 5 vitet të fundit, duke dërguar çështje konkrete dhe emrin e prokurorit apo gjyqtarit. Detyra duhet realizuar me seriozitet dhe korrektësi. Flm!”
Skandalet e një mesazhi
Mesazhi, i cili duket komunikim “normal” mes drejtuesve policorë, përfshin në vetëvete një seri elementësh skandalozë.
Personat e përfshirë – Drejtori i Policisë së Elbasanit, Arjan Muça, ka caktuar Leonard Palushin si koordinator të këtij projekti për mbledhje informacionesh kundër gjyqtarëve dhe prokurorëve.
Oficeri Leonard Palushi është shkarkuar nga detyra në vitin 2017, me firmë të Drejtorit të Përgjithshëm të Policisë së asaj kohe, Haki Çako, nën dyshimet se ka neglizhuar luftën kundër kultivimit dhe trafikimit të narkotikëve në zonën e Kurbinit.
Është e paqartë se si është rikthyer sërish në detyrë oficeri Palushi, por tashmë ai është ngarkuar me detyrën delikate të “monitorimit” të korrupsionit të gjyqtarëve dhe prokurorëve.
Një ndër zyrtarët e tjerë që ka marrë porosinë e drejtorit të Policisë së Elbasanit për monitorimin e gjyqtarëve është Bedri Hasanaj, një tjetër oficer i uniformave blu, emri i të cilit rezulton në çështje droge.
Bedri Hasanaj është pezulluar nga detyra në vitin 2017 dhe është marrë nën hetim penal, pasi Shërbimi për Çështjet e Brendshme dhe Ankesave kishte dyshime se ai kishte marrë shuma të konsiderueshme parash për të lejuar kultivimin e kanabisit në Librazhd.
Megjithatë, duket se hetimet për Hasanaj nuk kanë konkluduar në akuzë zyrtare, pasi ai është në funksion në Qarkun e Elbasanit dhe është i ngarkuar, bashkë me të tjerë, për të raportuar ato që i duken si raste korruptive në gjyqësor.
Presion policor – Mesazhi i Drejtorit të Policisë së Elbasanit drejtuar zyrtavë vartës dëshmon për mentalitetin policor të shtetit shqiptar. “Shefat” e policisë ngarkohen që, në një kohë shumë të shkurtër (“brenda orës 14”) të hartojnë një listë me raste të dyshuara korruptive të gjyqtarëve dhe prokurorëve.
Kjo “detyrë që duhet kryer me seriozitet dhe korrektësi” konsiderohet si një presion i hapur policor ndaj prokurorëve dhe gjyqtarëve.
Kodi i Procedurës Penale parashikon që puna e policisë kontrollohet nga Prokuroria dhe ligjshmëria e kësaj të fundit nga gjykata.
Por, duket se Policia i ka përmbysur raportet, duke e vendosur veten mbi sistemin e drejtësisë, si edhe duke i dhënë tagër vetes për të gjykuar mbi vendimmarrjet e prokurorëve dhe gjyqtarëve.
Policia mbi Vetingun – Koha e dërgimit të këtij mesazhi përkon me periudhën kur strukturat e Vetingut po kryejnë gjerësisht procesin e rivlerësimit kalimtar të gjyqtarëve dhe prokurorëve.
Komisioni i Pavarur i Kualifikimit dhe Kolegji i Posaçëm i Apelimit janë strukturat ligjore që vlerësojnë integritetin profesional dhe personal të gjyqtarëve dhe prokurorëve.
Por, zyrtarët policorë duket se i kanë veshur vetes rolin e strukturave të “Vetingut”, për më tepër që nuk është e qartë se për çfarë qëllimesh do të përdoret informacioni mbi rastet që “dyshohen korruptive në 5 vitet e fundit”.
