Testimi serologjik në QSUT, si dhe në dy spitalet e kthyera në Covid, Infektivin dhe Shefqet Ndroqi, ka treguar se vetëm 5.4 % e stafeve shëndetësore kanë kaluar Covid-19, duke krijuar anti-trupa.
Kjo pohohet nga shefi i laboratorit të mikrobiologjisë, Andi Koraqi, i cili për Tv Klan, tha se analiza serologjike ka treguar një nivel të ulët prekshmërie në përgjithësi, që është tek 5.3-5.4 %.
Pavijonet më të prekura nga Covid-19, janë ato të shërbimit të urgjencës dhe reanimacioni.
“Më të prekurit janë ata që janë në vijën e parë që janë urgjencat, reanimacionet si dhe spitalet Covid 1 dhe Covid 2”, sqaroi Koraqi.
Prej më shumë se dy ditësh në QSUT po kryhen edhe analizat për Covid.
Në laboratorin e QSUT mund të kryhen deri në 1 mijë analiza për Covid. Koraqi thotë se ato do të shërbejnë vetëm për kryerjen e testit të negativizimit të pacientëve në dy spitalet Covid.
“Është vetëm për pacientët e spitaleve Covid 1 ose Covid 2. Bëhet vetëm për negativizimin. Pra është e gatshme vetëm për pacientët që janë të gatshëm të dalin nga spitali”, sqaron ai.
QSUT u kthye në një vatër të infektimit me koronavirus. Një numër mjekësh dhe staf u prekën nga virusi duke e përhapur atë edhe te pacientët.
