Koalicioni “Mundemi” i udhëhequr nga LSDM në Maqedoninë e Veriut rezulton fitues i zgjedhjeve në Maqedoninë e Veriut.
Ky koalicion ka arritur të marrë 46 deputetë, ndërsa koalicioni i udhëhequr nga VMRO-DPMNE, 44 deputetë.
BDI e Ali Ahmetit ka siguruar 15 deputetë, Aleanca për Shqiptarët dhe Alternativa 12, E Majta dy dhe PDSH një deputet.
Mandatet janë llogaritur në bazë të simulimit të Komisionit Shtetëror të Zgjedhjeve, referuar rezultateve fillestare jozyrtare nga zgjedhjet e parakohshme parlamentare, nga 3.421 qendra votimi.
9 partitë dhe koalicionet e tjera që morën pjesë në zgjedhje nuk kanë fituar mandat deputetësh.
Koalicioni i LSDM-së ka mbi 324.084 vota ose 36.12 për qind, koalicioni i VMRO-DPMNE-së me 312.745 vota ose 34.85 për qind, BDI 101.432 ose 11.3 për qind, Aleanca për Shqiptarët dhe Alternativa 76.425 ose 8.57, E Majta 37.420 ose 4.17, ndërsa PDSH 13.563 ose 1.51 për qind.
