Kryeministri Edi Rama ka reaguar përmes një postimi në rrjetet sociale lidhur me reagimet e opozitës së bashkuar, sipas të cilës ndryshimet kushtetuese që mundësojnë listat e hapura dhe ndalimin e koalicioneve parazgjedhore, shkelin marrëveshjen e arritur në Këshillin Politik.
Rama duke iu drejtuar Lulzim Bashës dhe opozitarëve të tjerë, i paralajmëron duke u shprehur “mos na nxisni kundër asaj marrëveshjeje që e bëmë për ju, po na lini ta votojmë”.
Reagimi i Ramës
“Një këshillë miqësore për Lulzim Bashën e kolegët opozitarë jashtë Kuvendit: Lërini sharjet e kërcënimet ju lutem e mos thoni u prish marrëveshja, se ajo marrëveshje u bë me ju e për ju, jo për ne!
Ne s’donim e s’duam administratë zgjedhore partiake, prandaj mos na provokoni se s’ua kemi borxh as ne, as populli jo e jo,pasi morët gjithçka deshët!
Peng Kuvendin e zgjedhësit,të cilëve do t’u japim mundësinë të votojnë për deputetin e jo vetëm për partinë,nuk i merrni dot!
Po mos na nxisni kundër asaj marrëveshjeje që e bëmë për ju, po na lini ta votojmë…”, shkruan Rama.
