Videoja që po shikoni sjell pamjet e rënda brenda banesës së familjes Josifi në Kombinat, ku ndodhi dhe horrori i vetë flijimit. Top-Channel është futur me kamerën e tij brenda dhomës ku është dergjur për 15 muaj, trupi i Anisa Josifti dhe shtrati shihet i mbuluar nga mizat.
Krah tij, Zhaneta kishte vendosur një ventilator që të ndihmohte në largimin e erës së rëndë dhe të insekteve.
Tashmë, dera e banesës së familjes Josifi qëndron e mbyllur, por fqinjët e pallateve përballë arrijnë t’i dallojnë me sy të lirë pas dritareve pa perde, dhomën dhe shtratin ku nëna dhe motra mbajtën në mënyrë makabre të pavarrosur vajzën tjetër.
Në këtë shtrat ‘ferri’ vajza që u gjet gjysmë e dekompozuar, lyhej nga e ëma dhe e motra me vaj e uthull, në pritje të ringjalljes së pretenduar.
Ngjarja e rëndë u zbulua mbrëmjen e 2 korrikut dhe tronditi opinionin publik. Në pallatin parafabrikat mbrapa ish-Mapos rruga “Hamdi Cenoimeri”, dy trupat e vdekur të dy grave kanë “bashkëjetuan” për ditë me radhë me banorët e lagjes. Zhaneta Josifi, 56 vjeçe dhe Anisa Josifi 30 vjeçe, u gjetën të vdekura në banesë, ndërsa në gjendje të rëndë ishte edhe vajza tjetër e Zhanetës, Blerta Josifi 34-vjeçe. Kjo e fundit bashkë me nënën e saj kishin mbajtur në banesë trupin e pajetë të Anisës, të cilin e lyenin me vaj e uthur që të mos binte erë.
Në banesën e tyre të thjeshtë në këtë lagje të Tiranës, policia gjeti shënime fetare, dhe fillimisht u raportua se nëna dhe dy vajzat kanë qenë praktikante të sektit të njohur si “Dëshmitarët e Jehovait”. Blerta ndodhet e shtruar në spitalin Psikiatrik të Tiranës dhe vetëm dëshmia e saj mund të zbardhë detaje nga ngjarja. Ndërkohë hetimet kanë nisur dhe oritet të zbulohet se cilit sekt i besonin verbërisht gratë e familjes Josifi që shkuan drejt vetëflijimit.
