Mjeku infeksionist Pëllumb Pipero tha se shtimi i rasteve me koronavirus ishte i pritshëm pas hapjes. Në emisionin Tempora, Pipero tha se me këtë virus duhet të bashkëjetojmë, duke ruajtuar distancën fizike, të ruajmë higjenën personale, dhe në ambientet e mbyllura maska është e detyrueshme dhe e domosdoshme.
“Mbajtja e maskave në supermarkete, qendra tregtare, spitale, është e detyrueshme. Mjekët s´duhet të bëjnë konsulta dhe vizita që zgjasin më tepër se 5-6 minuta pa maskë”, tha Pipero.
Lidhur me agresivitetin e Covid-19, Pipero tha se virulenca dhe transmetueshmëria e tij ka rënë.
“Të moshuarve dhe të sëmurve kronikë ky virus mund t´i marrë jetën. Nëse bëjmë një krahasim sot me periudhën e marsit, mund të them se sot vërtet zbulohen 80 raste, por në spital shtrohen 9 apo 10 persona, ndërsa në mars kishim 20 raste dhe 10 vinin në spital, pra 50 % e tyre”, tha Pipero.
Ai tha se strategjia që është ndjekur ka qenë gjurmim i rasteve, hetime inteligjente, dhe jo teste për depistime.
Pipero tha se testime janë bërë aq sa duhen dhe kjo është shumë e rëndësishme.
Ai tha se njerëzit duhet të shkojnë në plazhe dhe të respektojnë protokollet e vendosura.
“Në ujë, bregdet, rërë dhe shezlongje nuk ka koronavirus”, tha Pipero.
