Gjykata e Posaçme e Apelit kundër Krimit të Organizuar dhe Korrupsionit do të japë vendimin në datën 24 qershor lidhur me ish-ministrin e Brendshëm, Saimir Tahiri, dhe ish-drejtorin e Policisë së Vlorës, Jaeld Çela.
Pas më shumë se 5 orësh, në një seancë ku SPAK kërkoi 12 vjet burg për Tahirin me akuzën e trafikut të drogës në kuadrin e grupit të strukturuar kriminal, ashtu sikundër ka kërkuar edhe në shkallën e parë të gjykimit. Të njëjtin dënim, SPAK ka kërkuar edhe për Jaeld Çelën.
Tahiri dhe avokatët e tij kërkuan pafajësi në Apel, ndërsa Gjykata e Shkallës së Parë e Krimeve të Rënda, e ka dënuar për shpërdorim detyre me 5 vjet burg, dënim i konvertuar në 3.4 vjet shërbim prove.
Në një prononcim për mediat, Tahiri tha se ka kryer detyrën shumë më mirë se ata që kanë qenë para tij dhe pas tij, në postin e ministrit të Brendshëm. Tahiri e ka konsideruar si betejën e jetës këtë që po zhvillohet, ndërsa tha se do të respektojë vendimin e Gjykatës.
“Nuk më tundon rikthimi në politikë, pasi unë dorëzova mandatin e deputetit për t’u përballur me drejtësinë”, tha Tahiri. Ai shtoi se e di raportin e tij me të vërtetën.
Çfarë ndodhi sot në gjykatë?
E keni dëgjuar dhe stërdëgjuar dhe nuk bësoj ja vlen të zgjatem, ne folëm dhe kjo ishte e fundit. Tani duhet të flasë gjykata.
Ka ndonjë ndryshim nga ajo që keni thënë në gjykatën e shkallës së parë?
Kursejeni dhe për publikun këtë dhe se është bërë qesharake dhe gjyqi im, qytetarët kanë shumë gjëra të tjera për t’u marrë ka më shumë halle.
Besoni tek pafajësia?
Unë nuk kam folur shumë gjatë gjatë kohës që kanë qenë i akuzuar, e kam bërë këtë për të reskpektuar drejtësinë. Unë kam dorëzuar dhe mandatin, por nuk e kam bërë këtë, pasi mund të vija këtu si deputet dhe të shkoja dhe në Kuvend. Unë besoj tek drejtësia, para qytetarëve e familjes stime jam i bindur se kam bërë gjënë e duhur. E kam bërë detyrën më mirë se ata që ishin dhe ata që janë në detyrë.
A do rikthehesh në politikë nëse merrni pafajësinë?
Unë s’kam iku, nuk më tundon kjo historia e politikës, nuk më ka tunduar dhe kur kam qenë deputetë.
Do ta pranoni vendimin e gjykatës?
Do ta pranoj pa asnjë diskutim, do e pranoj siç çdo vendim gjykate.
