Humbja e ditës së djeshme 1-3 kundër Kukësit, ka bindur drejtuesit e Partizanit për një ndryshim në drejtimin e skuadrës.
Skuadra kryeqytetase brenda një viti është transformuar nga një ekip kampion, në luftën për sigurimin e mbijetesës, ndërsa për këtë situatë asnjë nga palët nuk ka marrë përgjegjësitë e tyre.
Pas humbjes me Kukësin, trajneri Adolfo Sormani nuk ka dalë para mediave me pretekstin se kishte probleme me grykët dhe nuk prononcohej dot. E ardhmja e tij në krye të “demave” duket e shkurtër, ndaj në kampin e kuq flitet se Sormanit i është afruar një post i lartë drejtues në akademinë Partizani, që pritet të gjallërohet me ndërtimin e shtëpisë së re. Mbrëmë kanë qarkulluar zëra se Adolfo Sormani ka dhënë dorëheqjen nga posti i trajnerit, por që zyrtarët e klubit nuk e kanë konfirmuar.
“Panorama Sport” për këtë lajm kërkoi të marrë një mendim edhe nga trajneri italian, por që nuk dha asnjë shpjegim. Gjithsesi, gjatë ditës së sotme, që përkon edhe me pushimin e skuadrës, pritet që mësohet vektori i së ardhmes së trajnerit Adolfo Sormani. Italiani pritet që të ketë një ballafaqim me drejtuesit për të vendosur më pas se çfarë do të ndodhë në vijim, ku gjasat janë që rrugët të ndahen.
