Prej ditës së djeshme policia ka bllokuar rrugët hyrëse për në Tiranë. Akset rrugore që lidhin kryeqytetin me qytete të tjera, Elbasani apo Durrësi, por edhe aksi i veriut, janë të bllokuar nga forcat e policisë, që nuk japin shpjegime.
Zyrtarisht thuhet se Tirana është zonë e kuqe, referuar rasteve me Covid-19, dhe zbatohen rregullat, ndërsa duket se gjithçka ka të bëjë me një parandalim të vërshimit të qytetarëve për të marrë pjesë në protestë.
Sot ka pasur një bllokim te mbikalimi i Shkozetit, në aksin Durrës-Tiranë, por jo vetëm, edhe në aksin Elbasan-Tiranë, ka bllokime.
Një ditë më parë nga qytete të ndryshme të vendit u raportuan raste kur policia nuk lejonte hyrjen në Tiranë të qytetarëve që kanë dashur ti bashkohen protestës së organizuar nga Aleanca për Mbrojtjen e Teatrit.
Sot në 16:30, artistët kanë thirrur një tjetër protest, ndërsa partitë e opozitës, si dhe mjaft organizata kanë shprehur mbështetjen, duke i kërkuar anëtarëve të tyre që të jenë të pranishëm në bulevardin “Dëshmorët e Kombit”, para Ministrisë së Brendshme.
