Një plagosje me armë zjarri ka ndodhur gjatë natës në fshatin Kameras të Fushë Krujës. Policia bëri me dije se ka mbetur i plagosur gjatë një tentative vjedhjeje, pronari i një stalle bagëtish, Ardian Babasi. Ky i fundit ndodhet jashtë rrezikut për jetën.
“Rreth orës 02:25, në fshatin Kameras, Fushë Krujë, gjatë një tentative për vjedhur bagëti të imëta në një stallë në pronësi të shtetasit A. B, 44 vjeç, ka mbetur i plagosur me armë zjarri shtetasi A. B., i cili ndodhet në spital, nën kujdesin e mjekëve, jashtë rrezikut për jetën. Në ambientet e Policisë janë shoqëruar disa persona të dyshuar ai autorë të ngjarjes. Grupi hetimor po punon për zbardhjen e plotë të saj”, njoftoi policia.
Sipas një rindërtimi paraprak të ngjarjes, thanë burime policore, disa persona të maskuar dhe të armatosur ka hyrë në stallën e bagëtisë, por janë pikasur nga ky i fundit. Autorët kanë qëlluar në mur për ta trembur, por nga rikosheta plumbi ka plagosur në krah 44-vjeçarin.
