Organizata Botërore e Shëndetësisë u kërkon shteteve që të hetojnë rastet e para të tyre, pas zbulimit të rëndësishëm që rezultoi në Francë.
Mjekët në Paris konfirmuan se pacienti zero në këtë vend daton në 27 dhjetor. Një person i diagnostikuar me pneumoni, kishte qenë në fakt i prekur nga koronavirusi, e kjo u vërtetua përmes ritestimit të një tamponi të marrë në atë kohë.
OBSH e konsideron këtë zhvillim “jo surprizues” dhe u bën thirrje vendeve që të rishqyrtojnë rastet me pneumoni në fund të 2019-ës për të parë nëse ka edhe shembuj të tjerë si Franca.
Zëdhënësi, Kristian Lindmajer tha se kjo sjell “krejtësisht një panoramë tjetër” dhe se ky zbulim na ndihmon të kuptojmë më mirë potencialin e qarkullimit të Covid-19.
Kina raportoi rastin e parë zyrtar me koronavirus tek OBSH me 31 dhjetor, ndërsa besohej se nuk kishte arritur në Europë deri në Janar. Por ky supozim u hodh poshtë nga zyrtarët në Francë.
