Agjensia e Prokurorimeve Publike ka shpallur fituesin e tenderit horror të Bashkisë së Tiranës për blerjen e arkivolëve për përballimin e Covid-19.
Në faqen zyrtare të Agjencisë së Prokurimeve Publike thuhet se fituesi i furnizimit të bashkisë me 56 arkivolë për fëmijë nën 1 vjeç, 75 për të rritur dhe 5 më të mëdha, është Agron Hoxha.
Në një kompani me të njëjtin emër, ka fituar edhe në vitin 2016, por me një fond prej 486.000 lekësh.
Boldnews.al publikoi disa ditë më parë dokumentin, sipas të cilit, Autoriteti kontraktor, Agjencia e Shërbimeve Funerale, do të zhvillojë procedurën e prokurimit “Blerje arkivola për përballimin e COVID-19”, në datë 24 Prill 2020.
Agjencia e Funeraleve në Bashkinë e Tiranës kërkon të blejë plot 136 arkivolë.
Nga kjo sasi, autoriteti kontraktor kërkon që arkivolët të jenë të përmasave të ndryshme. Konkretisht, kërkohet të blihen 56 arkivolë të vegjël, për fëmijë deri në 1 vjeç; 75 copë arkivolë të mëdhenj të madhësive standarte dhe 5 copë arkivolë më të mëdhenj se standarit.
Pas publikimit të një lajmi të tillë, mbi këtë tender horror, Kryebashkiaku Erion Veliaj ka reaguar duke mohuar një gjë të tillë, pra blerjen e arkivolëve për përballimin e Covid-19.
Në fakt kjo frazë ndodhet në dokummentin e shpalljes së tenderit.
Veliaj sqaron se Bashkia në detyrat e saj mbulon dhe kryen të gjithë shërbimin funerale për tre kategori të caktuara, sikurse janë ata që janë të vetmuar, foshnjat që lindin të pa jete, si dhe viktimat nga ndonjë fatkeqësi.
Ai nënvizoi se Bashkia e Tiranës siç bën çdo vit për këto 3 kategori, ka bërë edhe këtë vit, por këtë vit është përfshirë dhe kategoria e atyre familjeve që fatkeqësisht kanë humbur një familjar për shkak të pandemisë.
