Nga Boldnews.al
Kompania farmaceutike “OES Distrimed” është shpallur fituese e një tenderi me garë fiktive, me vlerë 200 mijë euro, e cila i bashkohet rreth 3 milionë eurove të tjera që ka fituar në një vit kjo shoqëri, në prokurime pa konkurencë.
Qendra Spitalore Universitare “Nënë Tereza” (QSUT) ka shpallur kompaninë “OES Distrimed” fituese në tenderin “Blerje materiale mjekësore kardio-vaskulare”, me fond limit rreth 220 milionë lekë të vjetra me TVSH (rreth 200 mijë euro).
Në tender kanë marrë pjesë, krahas kompanisë fituese, “OES Distrimed”, edhe operatorët “Biometrik” dhe “Montal”.
Këto dy kompani janë skualifikuar nga Komisioni i Vlerësimit të Ofertave të QSUT, pasi ato nuk kishin dorëzuar ofertë ekonomike. Praktikisht, përfshirja e tyre në tender krijonte një konkurencë fiktive.
Në përfundim fitues u shpall “OES Distrimed”, e vetmja që kishte paraqitur një ofertë ekonomike.
Por, situata me këtë tender nuk është aq e thjeshtë dhe aspak rastësore.
Tre kompanitë e përfshira në këtë tender, si edhe një e katërt, “Euromed”, përbëjnë një grup me sjellje të ngjashme në tenderat publikë.
Ato duket se kanë krijuar një grupim, që i ngjan më shumë një “trusti”, ku, nëse njëra paraqet ofertë ekonomike, të tjerat përfshihen “fiktivisht” në garë, pa dorëzuar asnjë dokumentacion.
“Boldnews.al” i ka pasur në vëmendje sjelljen e këtyre kompanive në procedurat e dyshimta tenderuese të zhvilluara nga Ministria e Shëndetësisë dhe strukturat e saj të varësisë.
Redaksia është fokusuar në këto procedura të prokurimit, sidomos pas pretendimeve publike të kryeministrit Edi Rama se “Shqipëria nuk është një vend i pasur dhe nuk ka fonde të mjaftueshme për të përballuar si duhet pandeminë Covid-19”.
“OES Distrimed”, një vit, 13 mln euro pa garë
Në një hulumtin i kryer më herët nga “Boldnews.al”, rezulton se kompania “OES Distrimed”, vetëm në harkun kohor të një viti, është shpallur fituese pa garë reale në një seri procedurash prokurimi publik të Ministrisë së Shëndetësisë dhe institucione vartëse të saj, me fond limit total në rreth 13 milionë euro.
Prej Prillit 2019 e deri në Janar 2020, kompania “OES Distrimed” është shpallur fituese në 7 tendera pa garë reale, për një fond prej rreth 3.5 milionë euro.
Në Mars 2020, “OES Distrimed”, në bashkëpunim me “Euromed”, u shpallën fituese të tenderit “Blerje materiale për nevojat e spitaleve publike”, me fond limit rreth 10 milionë euro, bashkë me TVSH.
Në këtë tender morën pjesë edhe tre kompani të tjera, të cilat u skualifikuan, pasi nuk kishin paraqitur ofertë ekonomike. Pra, praktikisht, ishin përfshirë në tender, thjeshtë “për numër”.
“Trusti”
Në një tjetër hulumtin, “Boldnews.al” publikoi të dhëna, në bazë të të cilave dukej se ishte krijuar një lloj “trusti” mes 4 kompani farmaceutike, “OES Distrimed”, “Biometrik”, “Euromed” dhe “Montal”.
Redaksia verifikoi tenderat mbi 100 mijë euro, të zhvilluar nga strukturat shëndetësore gjatë 3 viteve të fundit, ku ishin të përfshira të gjitha ose një pjesë e këtyre 4 kompanive.
Në të gjitha rastet e hulumtuara, konkluzioni ishte i njëjtë- nëse njëra prej këtyre kompanive paraqiste një ofertë ekonomike, të tjerat përfshiheshin në tender pa dorëzuar asnjë dokumentacion. Dhe, në përfundim, shpallej fituese vetëm ajo kompani që kishte dhënë ofertë.
Një sjellje e tillë e këtyre kompanive u konstatua në të paktën 20 tendera me vlerë fondi limit mbi 100 mijë euro, gjatë periudhës 2017-2020.
Nga të dhënat, rezultoi se kompania “OES Distrimed” ishte shpallur fituese në 8 tendera, ndërkohë që kishte pasur përballë “fiktivisht”, pra pa ofertë, një ose të gjitha kompanitë e asaj që mund të konsiderohet “trust”,
Kompania “Biometrik” ishte shpallur fituese në 5 tendera, pas një gare pa rivalitet me një ose tre kompanitë e tjera të “grupit”.
Në vijim, “Euromed” ishte shpallur fituese në 4 tendera, ku përballë kishte “fiktivisht” kompanitë e “trustit”.
“Montal” ishte shpallur fituese në 3 tendera mbi 100 mijë euro, në procedura ku dukej se ishte “toleruar” nga 3 pjesëtarët e tjerë të “grupit”, të cilët janë paraqitur në tendera pa dorëzuar ofertë ekonomike ose dokumentacion.
