Në një kohë kur spitalet shqiptare përballen me mungesë të theksuar të ilaçeve, kushte të mjerueshme infrastrukturore dhe shërbime bazike të pamjaftueshme, Ministrja e Shëndetësisë Evis Sala, ka mbajtur një leksion të hapur me studentët ku ka folur për rolin e Inteligjencës Artificiale në transformimin e diagnostikës mjekësore.
Ministrja foli për përvojën e saj akademike në qendra prestigjioze ndërkombëtare dhe për nevojën që brezi i ri i mjekëve të përqafojë inovacionin teknologjik.
Ajo inkurajoi studentët të përqafojnë inovacionin dhe të bëhen pjesë aktive e zhvillimeve të reja në mjekësi, duke theksuar se profesionistët e rinj do të kenë një rol kyç në ndërtimin e një sistemi shëndetësor më modern, më efikas dhe të orientuar drejt teknologjisë.
“IA nuk do zëvendësojë radiologët, por do zëvendësojë ata që nuk e përdorin atë”, u shpreh ministrja Sala.
Por realiteti i përditshëm në spitalet tona është krejt tjetër. Spitalet shqiptare janë prej kohësh në qendër të denoncimeve për gjendjen e tyre të rënduar dhe mungesën e standardeve bazike.
Raportet dhe dëshmitë e pacientëve tregojnë një panoramë të zymtë, ku problemet strukturore dhe menaxheriale e bëjnë trajtimin shëndetësor të pasigurt dhe shpesh çnjerëzor.
Një nga problematikat më të mëdha është infrastruktura e amortizuar.
Pavijonet shpesh janë të mbushura me lagështi, rrjete elektrike të vjetruara dhe kushte higjieno-sanitare të papranueshme. Pacientët trajtohen në dhoma që nuk përmbushin as sipërfaqen minimale për shtrat, duke rrezikuar shëndetin e tyre.
Një tjetër shqetësim i madh është mungesa e ilaçeve dhe analizave laboratorike.
Shumë herë pacientët detyrohen t’i blejnë vetë medikamentet bazë, ndërsa analizat laboratorike ndërpriten për shkak të kontratave koncesionare, duke lënë pa trajtim të duhur mijëra të sëmurë.
