Gazment Bardhi, Sekretar i Përgjithshëm i PD-së, ka reaguar lidhur me situatën e bashkëqytetarëve në kufirin tokësor midis Shqipërisë dhe Greqisë, duke akuzuar Qeverinë se i ka kaluar limitet e trajtimit çnjerëzor.
Bardhi shkruan në rrjetet sociale se pjesa dërrmuese e tyre janë punonjës sezonalë në shtetin grek, pa asnjë mundësi për të jetuar atje pa punë.
“Një vend anëtar i NATO-s dhe Këshillit të Europës, kandidat për anëtar në Bashkimin Europian, nuk mund të sillet kurrë me standardet e Koresë së Veriut ndaj qytetarëve të tij.
Qytetarë të lënë në mes të rrugës, për ditë të tëra, pa ushqim, pa ujë dhe pa asnjë ndihmë, po rrezikojnë jetën, vetëm për shkak se Qeveria nuk ushtron përgjegjësinë e saj ligjore.
Është e patolerueshme që Qeveria vijon me kokëfortësi injorimin e të drejtës së qytetarëve shqiptarë për të hyrë në atdheun e tyre. Ky është krim”, shkruan Bardhi.
