Lezha ka regjistruar ditën e djeshme rastin e parë të infektuar me Covid-19. Bëhet fjalë për një infermiere nga fshati Kallmet, e cila ndodhet në terapi intensive në spitalin Infektiv në Tiranë.
Në fshatin kallmet ku ka jetuar infermierja banorët vazhdojnë jetën normale, ku vihet re se ka një kujdes të shtuar.
Familjarët e infermieres janë të vetëdijshëm dhe menjëherë sapo kanë marrë vesh se një i afërm i tyre ka rezultuar pozitiv janë vetëkarantinuar në shtëpinë e tyre.
Gjendja e tyre shëndetësore nuk ka shfaqur probleme deri tani dhe pritet rezultati i analizave i cili do të konfirmojë nëse ka të tjerë të infektuar nga personat e kontaktit të infermieres si në familje dhe në stafin mjekësor ose jo.
Në qytetin e Lezhës konfirmimi i rastit të parë me Covid-19 ka shkaktuar shqetësim dhe ka rritur edhe më tepër ndërgjegjësimin edhe pse shihen ende ne rrugë qytetarë të ndryshëm.
Pas konfirmimit të infermieres me covid-19, poliklinika e Lezhës, e cila është kthyer në qendër shëndetësore, është dezinfektuar ditën e djeshme, dhe janë të mbyllura për publikun, ndërkohë stafit mjekësor që ka patur më tepër kontakt me infermieren, i është kërkuar të vetëkarantinohen.
Edhe në spitalin e Lezhës ku infermierja ka qenë e shtruar, mjekët dhe infermierët që i kanë shërbyer gjatë kohës së qëndrimit të saj në spital, janë vetëkarantinuar si një masë parandaluese, dhe pritet tu merret analizat, të cilat do të konfirmojnë nëse ka të tjerë të infektuar.
ABC Neës raporton se dyshohet se në qytetin e Lezhës ka raste të tjera të infektuar me Covid-19.
Gjatë ditës së djeshme ka qenë një çift, të cilit i janë kryer analizat e dyta për shkak të dyshimeve se mund të jenë prekur nga koronavirusi, dhe pritet rezultati përfundimtar i tyre.
Bluzat e bardha të këtij qyteti mendojnë që nuk është i vetmi rast, dhe ka të tjerë persona që mund të jenë infektuar nga Covid-19.
