Shkodra, e cila i është shtuar hartës së qyteteve të prekura me Covid 19, ka identifikuar rastin e dytë me koronavirus.
Në orët e fundit është konfirmuar se një oficer i policisë gjyqësore ka rezultuar pozitiv me Covid 19.
Pritet që strukturat e shëndetit, të specializuara në rastet infektive, të identifikojnë kontaktet që ka pasur oficeri i policisë gjyqësore, ndërkohë që është vetëkarantinuar bashkë me familjarë të tij.
Nuk dihet se si mund të jetëinfektuar punonjësi i policisë gjyqësore, por dyshimet janë se mund të ketë marrë virusin nga kontakte me persona klandestinë, kryesisht sirianë, që kanë tentuar të kalojnë nga Shkodra drejt Malit të Zi, dhe që janë ndaluar nga policia.
Më parë ishte identifikuar një 62 vjeçare e prekur me Covid 19. Shkodra ishte një nga qytetet që nuk kishte regjistruar më parë raste me koronavirus.
Deri mesditën e djeshme numri i të prekurve me Covid 19 në Shqipëri ka arritur në 104, ndërkohë që koronavirusi ka shkaktuar 4 viktima.
Në spitalin Infektiv numri i të shtruarve me koronavirus është 49, të paktën sipas shifrave zyrtare të raportuara një ditë më parë.
