Ministri i Shtetit për Rindërtimin, Arben Ahmetaj, tha sot se Qeveria është gati të nisë në terren punën për ndërtimin e 3400 banesave individuale.
“Sot qeveria ka kaluar vendimin për miratimin e fondit limit prej 8.7 mld lekësh, që do i kalojnë të dyja njësive zbatuese, Fondit Shqiptar të Zhvillimit dhe Bashkisë së Tiranës”, tha Ahmetaj, duke sqaruar se 6.28 mld lekë do te jenë për Fondin Shqiptar të Zhvillimit, për 2500 banesa individuale që do të ndërtohen nga ky fond.
Ndërkohë që një shumë prek 2.2 mld lekësh i akordohen Bashkisë së Tiranës, e cila do të ndërtojë 889 njësi apo shtëpi individuale.
Ato do të ndërtohen saktësisht, 312 banesa me tipologjinë 1+1; 334 2+1 dhe 243 banesa 3+1.
“Informoj të interesuarit, duke filluar që nga sipërmarrjet, dhomat e tregtisë shqiptare, të kategorive të ndryshme, qoftë dhomat e huaja të biznesit, se javën që vjen shpallet gara ndërkombëtare nga dy njësitë e mësipërme, Bashkia e Tiranës dhe Fondi Shqiptar i Zhvillimit për 3400 shtëpi individuale”, tha ai.
Sipas tij, Instituti i Ndërtimit e përfundon procesin në 30 mars dhe Bashkia e Tiranës në 23 prill, pasi të kemi shifrat finale të vlerësimit do të ketë prokurim të dytë për pjesën e mbetur.
