Presidenti Ilir Meta i është përgjigjur qëndrimeve dhe komenteve të Kryeministrit Edi Rama dhe kreut të Grupit Parlamentar socialist, Taulant Balla, lidhur me letrën që i ka dërguar kreut të Komisionit Evropian pas rekomandimit për çeljen e negociatave me BE.
“Jo vetëm dje por edhe sot pas rrjedhjes nga Qeveria në një TV të letrës që unë i kisha çuar, Komisionerit për Zgjerimin gjoja se ishte kundër integrimit dhe çeljes së negociatave, që e anoncoi spektakolari Tao Tao dhe sot iu bë jehonë nga e nderura zonja e Bilalit jam i detyruar në raport me qytetarët për tu bërë të qartë letrën që ua ia kisha dërguar jo për ta bërë të ditur publikut, por për të ndihmuar KE për të qenë më i vëmendshëm me një cështje kaq kritike sic është integriteti i Kushtetueses aq më tepër që në formulimin e bërë të krijohej përshtypja sikur problemi ishte krijuar nga interpretimi i ndryshëm që kishte bërë presidenti”, tha Meta.
Presidenti tha se Rilindja kërkon të kapë Gjykatën Kushtetuese, ndërsa akuzoi mazhorancën se ka shkaktuar këtë situatë, pasi i ka kapur të gjitha institucionet.
“Kapja e Kushtetueses eleminon arbitrin, nuk kemi sot asnj arbitër. Kushtetuesja i përket të gjithë shqiptarëve, jo vetëm mazhorancës”, tha Meta.
Presidenti theksoi se mazhoranca duhej të priste opinionin e Komisionit të Venecias lidhur me procedurat e betimit të anëtarëve të Gjykatës Kushtetuese.
“Pse nuk e pritën Venecian, çfarë tregon kjo përgjegjshmëri? Jo, kjo tregon se duan të kapin çdo institucion, përfshi edhe Kushtetuesen”, tha Meta.
Presidenti doli në konferencën për mediat pasi më parë Kryeministri Edi Rama e akuzoi se kishte dërguar letrën me synim bllokimin e hapjes së negociatave.
“Për herë të parë që nga krijimi i Bashkimit Europian një president çon letra në Bruksel për të minuar urën mes Europës e vendit të tij! Për herë të parë në historinë e zgjerimit të BE një vend kandidat ka Brukselin PRO dhe Presidentin e vet KUNDËR vendit e KUNDËR vetë Brukselit..
Sa nisi terapia intensive e Reformës në Drejtësi nisi dhe reaksioni me temperatura të larta në organizmin e shtetit të sëmurë prej kancerit të korrupsionit! Përpëlitjet e ethshme me bojkote, molotovë, dekrete janë thjesht pasoja të intensitetit të terapisë mbi kancerin..
Shqipëria mund ta marrë mund të mos e marrë PO-në që meriton nga Këshilli Europian, po ama kurimi deri në fund i sëmundjes dërrmuese që i ka ngrënë trupin e shpirtin prej 30 vjetësh,as mund dhe as do ndalet dot me kriza të turpshme të provokuara nga terapia e Reformës në Drejtësi!”, shprehej Rama.
