Koronavirus që ka prekur Italinë rrezikon edhe dy miqësoret e kombëtares shqiptare në program për t’u luajtur në fund të muajit mars. Skuadra kuqezi duhet të përballet në datën 27 me San Marino në transfertë, ndërsa tre ditë më pas në Udine kundër Sllovenisë. Deri tani nuk ka një vendim, por mediat italiane flasin se qevria në vend pritet të nxjerrë një dekret, që ndalon për një muaj ndeshjet me tifozë.
Burime në Federatën Shqiptare të Futbollit bëjnë me dije për “Balkanweb”, se po monitorojnë situatën dhe janë në kontakt të vazhdueshëm me organizatorët, por për momentin nuk ka ndryshim plani.
Gjithsesi, nëse dekreti i paralajmëruar nga mediat përtej Adriatikut firmoset nga qeveria në vend, atëherë vështirë që këto ndeshje të zhvillohen sipas programit. Në agjendën ekzistuese, kombëtarja kuqezi duhet të luajë në fillim në San Marino dhe më pas në Udine. Për shtetin e vogël ka pak informacion në lidhje me përhapjen e virusit, por gjithsesi pozicioni i tij gjeografik brenda gadishullit Apenin e bën rrezikun evident. Nga ana tjetër, Udine është një nga zonat më të prekura nga Coronavirus. Në këtë mënyrë, në Federatën Shqiptare të Futbollit duhet të përgatisin edhe disa plane rezervë për miqësoret e marsit të përfaqësueses kuqezi.
