Italia, një destinacion i përhershëm i të pasurve dhe të famshmëve, po tërheq një valë të re të individëve ultra të pasur, që kërkojnë të përfitojnë nga një mjedis i favorshëm për investitorët, nga tregu i lulëzuar i pasurive të paluajtshme dhe regjimi tatimor i ulët.
Ndërsa shumë vende të tjera po ashpërsojnë masat ndaj super të pasurve, Italia po ndjek një drejtim të kundërt; regjimi i saj me tatim të sheshtë i ka joshur shpenzuesit e mëdhenj, të tërhequr nga jeta luksoze dhe skena e gjallë e biznesit në Milano.
Pavarësisht faktit që në vitin 2024 është dyfishuar tarifa për të ardhurat e individëve me pasuri të lartë në 200,000 euro, kjo nuk ka ndikuar ndjeshëm në dëshirën për të shijuar “la dolce vita”.
Sipas kompanisë Henley & Partners, Italia është bërë këtë vit një nga destinacionet kryesore për shpërnguljen e të pasurve në Europë. Edhe pse shifrat e emigrimit të milionerëve kanë ngritur disa pikëpyetje dhe lëvizjet e pasurisë në shkallë globale janë të vështira për t’u ndjekur me saktësi, një sërë figurash të njohura kanë vendosur të zhvendosen në Itali gjatë muajve të fundit. Të dhënat e Henley & Partners tregojnë se numri total i të ardhurve të rinj me pasuri të lartë në Itali deri më tani këtë vit mund të jetë deri në 3,600.
Regjimi me tatim të sheshtë në Itali u prezantua në vitin 2017, si pjesë e një përpjekjeje më të gjerë nga qeveria e atëhershme e qendrës së majtë për të tërhequr investitorë të huaj dhe për të inkurajuar rikthimin e talenteve vendase pas krizës së borxhit në eurozonë. Nga ana tjetër, kjo ka nxitur një valë të re biznesesh që synojnë të shërbejnë për këtë fluks të ri pasurie, veçanërisht në qendrën financiare dhe të modës në vend, Milano.
Ndërkohë, të pasurit që kanë shkuar në Itali kanë sjellë një rritje të ndjeshme të çmimeve të pasurive të paluajtshme në disa nga zonat më të kërkuara të vendit, nga Toscana dhe Riviera Italiane, te qytete si Roma, Venecia dhe Firence. Megjithatë, Milano dhe rajoni përreth liqeneve janë shfaqur si zgjedhja më e preferuar.
Çmimet e pronave në Milano janë rritur me 49% që kur u prezantua regjimi me tatim të sheshtë në vitin 2017, krahasuar me një rritje prej vetëm 10.9% në qytetet e tjera të mëdha italiane, sipas grupit të pasurive të paluajtshme Tecnocasa. Ndërkohë, kompania ndërkombëtare Knight Frank parashikon që tregu i pasurive luksoze në Milano të rritet me 3.5% të tjera në vitin 2025.
