Sekretari i Përgjithshëm i PD-së, Gazmend Bardhi, reagoi sot ndaj deklaratave të Kryeministrit Edi Rama në Kuvend, ku ndër të tjera foli për amnistinë fiskale dhe luftën ndaj pasurive dhe aseteve të krimit.
Por, Bardhi deklaroi se Edi Rama është i pafuqishëm për të goditur pasuritë e krimit.
“Asnjë pasuri reale e krimit nuk është prekur dhe as nuk do të preket nga OFL-ja e Edi Ramës, sepse shumë nga këto pasuri janë shpërblim për kriminelët që kanë blerë vota për pushtetin e Edi Ramës.
Kur bëhet fjalë për të goditur krimin, Edi Rama ka vetëm fjalë dhe propagandë. Krimi ndërton dhe pastron para në mes të Tiranës dhe Edi Rama nuk e prek dot. Krimi merr tendera publikë nga qeveria e Edi Ramës. Krimi ka leje ekskluzive mbi pasuritë natyrore të vendit dhe Edi Rama vazhdon të punojë për ta. Krimi e ka folenë në zyrën e Edi Ramës!
Partner me krimin që në fillimin e karrierës si Kryetar Bashkie, Edi Rama është i pabesueshëm!”, tha Bardhi.
Çfarë tha Rama në Kuvend?
“Nuk do të ketë asnjë tolerancë të mundshme nga ana e shtetit lidhur me pasuritë dhe paratë e krimit”. Kështu deklaroi Kryeministri Edi Rama gjatë seancës parlamentare, duke folur për amnistinë fiskale, duke ftuar biznesmenët që kanë të ardhura të konsiderueshme që të përfitojnë nga ky proces.
“OFL ndan me thikë “paranë e krimit” nga paraja e fituar në mënyrë të ndershme. Askush mos bëjë shaka, pasi shteti do të hyjë në një fazë të re.
Do të kërkojmë informacione mbi pasuritë që kanë shqiptarët jashtë vendit. Shumë asete nuk janë në emrat e vërtetë, ndaj kush kërkon të përfitojë nga amnistia do të ketë një kohë të kufizuar, pasi në të kundërt do t’i nënshtrohen ligjit njëlloj si paratë dhe pasuritë e vendosura nga krimi”, tha Rama.
Sipas tij, tani po shihet se si po shkërmoqet oligarkia e gjyqtarëve dhe prokurorëve, por të jeni të sigurtë se ata s’kanë gjë akoma.
“Amnistia fiskale dhe penale që shpresoj të ketë mbështetjen e plotë të Kuvendit është domosdoshmëri për t’ju dhënë shqiptarëve që prej 30 vjetësh kanë punuar dhe jetuar ndershmërisht në emigracion apo në vend, mundësinë që të formalizojnë të ardhurat e tyre nga puna duke formalizuar duke deklaruar ato që nuk i kanë deklaruar dhe duke i futur paratë e tyre në bankat e vendit. Ashtu sikur formalizimin e aseteve të tyre, dimë që ka asete të paformalizuara ose që nuk janë në emrin e të vërtetëve, të vërtetët do të kenë mundësi të shfaqen dhe të formalizojnë asetet, nëse nuk duan që pas amnistisë të jenë objekt i ligjit për asetet kriminale”, tha Rama.
