Klubi i Tiranës ka reaguar mbi aktet vandale të disa individëve mes tifozëve bardheblu që kanë dëmtuar dje një numër të madh stolash në stadiumin “Air Albania”.
Gjatë sfidës së djeshme mes Kukësit dhe Tiranës u dëmtuan 164 ulëse, 145 në krahun e tifozëve të Tiranës dhe 19 nga ana e tifozëve të Kukësit.
Tirana mbështet nismën ligjore të Federatës Shqiptare të Futbollit, për të denoncuar pranë Policisë së Tiranës individët që kanë dëmtuar stadiumin.
24-herë kampionët e Shqipërisë i quajnë këto veprime si vandale dhe që bien ndesh me parimet e klubit dhe tifozerisë në përgjithësi.
Deklarata e plotë:
“Klubi i Futbollit Tirana dënon ashpër aktet vandale të disa individëve mes tifozëve të Tiranës që kanë dëmtuar dje një numër të madh stolash në stadiumin “Air Albania”.
Tifozeria bardheblu është pa diskutim një nga asetet më të çmuara që kryeqyteti ka, por të tilla akte dëmtojnë imazhin, klubin, impiantin modern ku po punojmë që futbolli të jetë një festë dhe çdo ditë e më tepër familjarë.
KF Tirana mbështet nismën ligjore të Federatës Shqiptare të Futbollit, për të denoncuar pranë Policisë së Tiranës individët që kanë dëmtuar stadiumin. Materialet filmike do të dënojnë personat përgjegjës për këto shfaqje të shëmtuara, të cilat nuk kanë ndodhur dje për herë të parë, por në të gjitha ndeshjet e fundit në “Air Albania”.
Ftojmë të gjithë tifozët bardheblu ti bashkohen kësaj nisme që i shërben qytetarisë dhe futbollit. Jo vetëm në “Air Albania” por në çdo stadium, aktet vandale nga individë të caktuar nuk meritojnë të jenë pjesë e tifozerisë së mrekullueshme bardheblu”.
