Nënkryetari i LSI-së, Petrit Vasili, akuzoi, bashkëkryetarin e Komisionit për Reformën Zgjedhore se po provokon bllokimin e saj.
Vasili shkruan në rrjet se Gjiknuri dhe Rama kanë vetëm një mision, bllokimin e reformës zgjedhore.
Madje Vasili ironizoi Rilindjen, duke u shprehur se nuk do të mundin dot të bllokojnë këtë reformë edhe sikur në vend të Gjiknurit të çojnë në tryezë furgonin e “çunave problematikë”, një shprehje që sipas publikimeve të BILD është përdorur nga ish-ministri i Ramës në zgjedhjet vendore të Dibrës.
Reagimi i Vasilit erdhi pasi Gjiknuri nuk pranoi propozimin e opozitës së bashkuar lidhur me një moratorium të Vetting ndaj gjyqtarëve që do merren me çështjet zgjedhore dhe pasi u shpreh kundër një qeverie tranzitore apo kujdestare lidhur me zgjedhjet.
Postimi i Petrit Vasilit
Damian Gjiknuri provokon bllokimin e Reformës Zgjedhore!
Është e qartë që Gjiknuri dhe Rama kanë vetëm një mision të bllokojnë reformën zgjedhore.
Gjiknuri kërkon të bllokoje tranparencën e votës së lirë dhe të ndershme duke u fshehur pas pallavrave edramiste për reformën në drejtësi dhe shashkave propagandistike bajate.
Gjiknuri kërkon të pengojë propozimet e opozitës së bashkuar për reformën zgjedhore, për pastrimin e zgjedhjeve të ardhshme nga llumi i turpit të dosjes 184 dhe 339.
Gjiknuri e Rama si peng të “çunave problematikë” të Dibrës dhe të Shijakut kanë vetëm një interes atë që të bllokojnë me çdo formë reformën zgjedhore.
Rilindja nuk e bllokon dot reformën zgjedhore edhe sikur në vend të Gjiknurit të sjellë furgonin e “çunave problematikë”.
