Kreu i opozitës Lulzim basha, ka qenë mjaft i ashpër në reagimin e tij sa i përket veprimeve të prokurorisë, e cila në vend të hetojë hajdutët e Unazës së re ka marrë si të pandehur qytetarët që protestojnë, mes tyre dhe ish deputetin Klevis Balliun.
Me anë të një postimi në Facebook, Basha shkruan se nuk ka prokurori në Shqipëri që mund të frikësojë apo trembë qytetarët që protestojnë për të drejtat e tyre pas 30 viteve demokraci.
Sipas Bashës veprimet e prokurorisë tregojnë edhe njëherë se drejtësia në këtë vend është kapur nga krimi dhe Ed Rama.
Ja postimi i Bashës:
Prokuroria e kapur dhe e bërë palë me vjedhjen, nuk heton dhe ndëshkon hajdutët e 40 milion eurove në aferën e Unazës së Re, por përndjek dhe merr të pandehur qytetarët që protestojnë kundër hajdutërisë dhe babëzisë së qeveritarëve të korruptuar.
Marrja si të pandehur nga prokuroria e përfaqësuesit të opozitës Klevis Balliu dhe të qytetarëve Seit Hajderasi, Lulzim Maqinaj, Ilir Katiraj dhe Elton Skënderaj pse protestojnë për të mbrojtur shtëpitë dhe fëmijët e tyre, është akt politik, për të frikësuar qytetarët që kundërshtojnë arbitraritetin dhe hajdutërinë e Edi Ramës.
Në emër të Partisë Demokratike dua të bëj të qartë se 30 vjet pas rrëzimit të diktaturës nuk ka prokurori politike që mund të ndalë qytetarët e lirë të protestojnë ndaj korrupsionit dhe dhunës qeveritare. Nuk ka prokuror apo gjykatës të korruptuar që mund të frikësojë opozitën të jetë përkrahë qytetarëve dhe të denoncojë aferat kriminale e korruptive të Edi Ramës dhe ministrave të tij.
Akte të tilla dëshmojnë sesa e drejtë dhe jetike është beteja jonë me korrupsionin dhe krimin e organizuar. Denoncimi dhe reagimi ndaj korrupsionit, lidhjeve të krimit të organizuar me Edi Ramën dhe regjimin e shërbëtorëve të tij, nuk ka për t’u ndalur!
