Janë mbyllur 8-të takimet e kthimit të vlefshme për fazën e 1/8-ave të Kupës së Shqipërisë.
Në çerekfinale kanë kaluar ato ekipe që favorizoheshin nga rezultatet e ndeshjeve të para. Partizani, që ishte mposhtur 3-0 në Lezhë nga Besëlidhja, nuk ia ka dalë të përmbysë rezultatin dhe është eliminuar. Lezhjanët humbën 3-1 sot, por kalojnë më tej. Telushi, autor i të tre golave, nuk u mjaftoi të kuqve.
Me interes pritej Laçi-Bylisi, që përfundoi me rezultatin 3-2. Kurbinasit shënuan një gol të shpejtë me Grecën, ndërsa Nwabueze i dyfishoi shifrat. Gjithsesi ballshiotët nuk u dorëzuan dhe shënuan dy herë në portën e kurbinasve, duke kaluar më tej. Xhixha shënoi në shtesë për Laçin, por goli ka vlera vetëm për statistika.
Tirana fitoi me “poker” 4-0 kundër Kastriotit, kurse Vllaznia që kishte barazuar 2-2 në sfidën e parë me Flamurtarin, ka triumfuar në Vlorë me shifrat 0-2, duke arritur kualifikimin.
Kukësi ka bërë detyrën me Lushnjën, sikurse edhe Skënderbeu me Besën e Kavajës. Më tej ka kaluar edhe Teuta, që fitoi me përmbysje ndaj Erzenit.
Apolonia gjithashtu është kualifikuar, pasi sot barazoi në Gjirokastër me Luftëtarin. Fierakët kishin fituar 3-0 ndeshjen e parë dhe ishin favoritë për të kaluar në çerekfinale.
