“Shqipëria ndodhet sot në një nga momentet më kritike të saj, në lidhje me funksionimin e shtetit ligjor, atij shteti që garanton ligje dhe Kushtetutë të barabartë për të gjithë. Rilindja ka ndërmarrë një grusht të vërtetë shteti kundër Reformës në Drejtësi. Ka ndërmarrë një grusht të vërtetë shteti, kundër shtetit ligjor. Ka ndërmarrë një grusht të vërtetë shteti ndaj çdo të drejte dhe çdo integriteti ligjor minimal të shtetit shqiptar”. Kështu u shpreh nënkryetari i LSI-së, Petrit Vasili në një konferencë për mediat, duke akuzuar Rilindjen se po zhbën Reformën në Drejtësi me një mentalitet puçist.
Vasili tha se Rilindja po shkatërron ligjet e Reformës në Drejtësi të miratuara me konsensus, me mbështetjen e Venecias dhe partnerëve ndërkombëtarë.
“Këto ligje po shkatërrohen, po shqepen, po qepen sipas kostumit dhe vetë interesit të vetëm të Rilindjes që është kapja e institucioneve të drejtësisë dhe në mënyrë të veçantë e mbi të gjitha, e kapjes së Gjykatës Kushtetuese.
Pasi dështoi të rrëmbente kompetencat e Presidentit, për të caktuar gjykatësit në Gjykatë Kushtetuese, sot po ndiqet logjika e bërjes së faktit të kryer të kapjes së Gjykatës Kushtetuese dhe për të hequr kërkesat për realizimin e kësaj kapje antikushtetuese, antiligjore dhe puçistë. Po propozohet që betimi i gjykatësve kushtetues të bëhet jo më nga buza e Lanës, siç u bë betimi i supozuar, imagjinar i një kandidate Arta Vorpsi, po të kthehemi tek betimi tek posta e lagjes.
Pra me një letër të depozituar në postë, të nisur në postë. Gjykatësi Kushtetues fillon punë. Të nderuar qytetarë dhe qytetare, të gjithë shqiptarët nga i pari tek i fundit kanë qenë shumë të qartë, e kanë parë më së miri se çdo procedure betimi që lidhej me Presidentin e Republikës është kryer në mënyrë të menjëhershme ne kohën më të shkurtër dhe të gjithë shqiptarët kanë parë me sytë e tyre betimin e Gjykatësve Kushtetues, betimin e Prokurorëve të SPAK-ut e të tjerë të cilët janë kompetencë e Presidentit, të cilët janë kryer menjëherë pa asnjë vonesë në përputhje me Kushtetutën dhe në afatet minimale Kushtetuese.
Pra i gjithë veprimi që po konsumohet është finalizimi i kapjes të drejtësisë, shkatërrimi përfundimtar i Reformës në Drejtësi, dhe shkatërrimi i ëndrrës së shqiptarëve për të patur një drejtësi të paanshme, të drejtë e të barabartë për të gjithë në mënyrë që të krijohen institucione të tilla të kapura siç është në radhë të parë e mbi të gjitha Gjykata Kushtetuese për të pamundësuar e për të mos lejuar hetimin, dërgimin para drejtësisë, gjykimin e çështjeve të mëdha qindra milionëshe.
Duke filluar nga korrupsioni me Teatrin Kombëtar, duke filluar me ligjin e dividendit dhe me plotë çështje të tjera delikate të cilat kanë rënduar xhepat, financat publike, interesat e mëdha shtetërore dhe në mënyrë që këto mos të dënohen kurrë. Kjo është tentativa për të finalizuar kapjen e Gjykatës Kushtetuese”, tha Vasili.
