Katër të rinjtë e arrestuar për përplasjen me armë zjarri në qendër të Shkodrës do të dalin sot para Gjykatës së Shkodrës për t’u njohur me masën e sigurisë.
Ension Buraku, Argjend Rexha, Riad Xheladini dhe Liridon Lusha, do të njihen me masën e sigurisë.
Ata akuzohen se tentuan të vrisnin me armë zjarri Mirsad Metën, tashmë i shpallur në kërkim nga policia e Shkodrës. Nga shkëmbimi i zjarrit në Pedonalen e Shkodrës mbeti e plagosur kalimtarja Liljana Jeremia.
Ension Buraku, dyshohet se është personi që së bashku me tre të tjerët, Argjend Rexha nga Durrësi, Riad Xheladini nga Shkupi dhe Liridon Lusha nga Shkodra, kishin planifikuar ekzekutimin e Mirsad Meta.
Motivi i kësaj tentative vrasje, sipas policisë dhe prokurorisë, ishin mosmarrëveshjet e mëparshme në Gjermani mes Mirsad Meta dhe Ension Buraku.
Por situata mes tyre është agravuar akoma dhe më tepër, kur në 26 janar 2020 në banesën e Ornela Buraka, efektive policie në Durrës dhe motra e Ension Buraka, ka shpërthyer një sasi tritoli, duke sjellë vetëm dëme materiale.
Ension Buraka ka dyshuar menjëherë se ky akt-kriminal është kryer nga kundërshtari i tij Mirsad Meta.
Raportohet se Buraku para oficerëve të policisë ka marrë përgjegjësinë, duke u shprehur se miqtë e tij nuk e dinin pse ishin thirrur prej tij.
Buraku është shprehur në polici se “… në 5 shkurt 2020, unë së bashku me shokët e mi, Argjend Rexha dhe Riad Gjeladini,të cilët i njoh prej disa kohësh, konkretisht Riadin e njoh në shtetin e Gjermanisë, kurse Argjendin e njoh në Shqipëri, i kam takuar në qytetin e Durrësit dhe gjatë bisedave, u shpreha dëshirën atyre që së bashku të pimë një kafe në qytetin e Shkodrës”, raporton Faxnews.
