Emanuel Egbo është zgjedhur si trajneri i përkohshëm i bardhebluve dhe për pasojë do të drejtojë dhe derbin ndaj Partizanit e cila zhvillohet ditën e nesërme.
Ish-portieri i Tiranës doli sot në një konferencë për shtyp për të folur për ndeshjen.
Duke prekur situatën e trajnerit dhe detyrës që iu besua atij, Egbo, deklaron:
“Nuk e di nëse jam apo jo trajneri i duhur, por më kanë dhënë besim për të drejtuar skuadrën në këtë takim. Më shumë nuk di, por di që jam i detyruar të vazhdoj. Nuk jam unë gati për të shkuar deri në fund të sezonit. Te Tirana ka nevojë për trajner me më shumë eksperiencë. Kam drejtuar Bylisin, por Tirana duhet të ketë një staf dhe sa të kalojmë këtë ndeshje, do të vendoset”.
Duke u kthyer pas në kohë kur luante vetë në fushën e lojës si bardheblu, ish-portieri shton:
“Në kohën time ka qenë epokë tjetër. Kur kemi dalë kampion kemi qenë më ndryshe. Kur fillonte ndeshja, fillonte 1-0 për Tiranën, ndërsa tani çdo gjë ka ndryshuar. Të gjitha skuadrat janë aty ndërsa në kohën time ishin vetëm Tirana, Partizani dhe Dinamo”.
