Zëdhënësi i Presidentit Ilir Meta, Tedi Blushi i është përgjigjur deklaratave të bëra nga kreu i KED, Ardian Dvorani pas daljes nga prokuroria e Tiranës.
Blushi shprehet se “nga një dhunues me dashje i Kushtetutës dhe i ligjit, i mirëdokumentuar, i provuar dhe përsëritës në shkeljen e tyre, nuk presim asnjë reflektim publik”.
“Ne do të vazhdojmë të bashkëpunojmë me organin e akuzës për të vendosur drejtësinë në vend. Ky proces do të jetë i hapur dhe transparent për opinionin publik vendas dhe ndërkombëtar, për të ndaluar kapjen totale të institucioneve të drejtësisë, përmes kapjes së Gjykatës Kushtetuese, institucionit më të rëndësishëm që garanton funksionimin e shtetit të së drejtës në Republikën e Shqipërisë”, shton Blushi në reagimin e tij, përmes një shënimi në FB.
Çfarë deklaroi Dvorani
Dhashë shpjegime para prokurorëve/ Dvorani: Nuk ndërhyj, kam besim te drejtësia
Ardian Dvorani, kryetari i KED, është paraqitur mëngjesin e sotëm para Prokurorisë së Tiranës, pas kallëzimit të Presidentit Ilir Meta ndaj tij. Dvorani dha dëshminë e tij para prokurorit Alket Mersini, ndërsa një ditë më parë në prokurori shkoi Kreu i Shtetit, me cilësinë e personit që ka bërë kallëzimin. Pasi edhe Dvorani të japë dëshminë e tij, do të jetë organi i akuzës që do të vendosë se çfarë do të bëhet me kallëzimin penal ndaj kreut të KED-së.
