Pandeli Majko, ministër Shteti për Diasporën, i ka drejtuar një ael politikës që të reflektojë, pas tërmeteve që goditën vendin.
Majko shprehet se në kushtet kur vendi ka pësuar tre tërmete brenda një viti është e nevojshme që politika të ndryshojë pak lëkurë, kjo për njerëzit e traumatizuar, më së shumti.
“Nuk mendoj të them që ajo që po bën qeveria është gjëja më e zgjuar që mund të bëhet në këto momente, por një gjë e them me bindje, qeveria po bën atë që mundet. Nuk bëhet thjesht për të realizuar një fotografi. Është shumë e rëndësishme edhe për njerëzit e traumatizuar që të gjitha palët sipas parimit shumë mendje janë më shumë sesa disa mendje.
Prandaj në këto kushte kur Shqipërinë e kanë goditur tre tërmete brenda një viti është e nevojshme që politika të ndryshojë pak lëkurë nëse ka mundësi.
Nuk bëhet fjalë për një histori që do mbyllet brenda disa muajve do të duhet një kohë relativisht e gjatë. Do të duhen shpenzime shumë të mëdha për të tejkaluar dëmet e tre tërmeteve”, u shpreh Majko.
Duket se Majko dhe Rama janë në një gjatësi vale përsa i takon ftesës për dialog me opozitën. Ashtu si edhe Rama, i cili menjëherë pas tërmetit të 26 nëntorit ftoi opozitën në dialog, edhe Majko mendon të njëjtën gjë, dhe shton se ky dialog s’ka pse të jetë për foton e rradhës, por për njerëzit.
Gjithsesi nëse shkojmë pak përpara në kohë, le të themi 1 apo dy javë para 26 nëntorit, gjuha e përdorur nga Kryeministri Rama ndaj opozitës ishte shumë shumë larg dialogut. ishte i njëjti kryeministër që çoi vendin në zgjedhjet monopartiake më 30 qershor. Ishte i njëjti kryeministër, policia e të cilit nuk kurseu gazin helmues ndaj qytetarëve që protestonin, jo vetëm për largimin e tij, por edhe ndaj atyre që tentonin të mbronin pronën.
Është i njëjti Kryeministër që sot shfaqet ekran më ekran duke dhuruar show me tërmetin që shkaktoi 51 viktima dhe mbi 900 të plagosur dhe la pa shtëpi disa mijëra qytetarë.
