Tre persona janë arrestuar nga policia e Shkodrës pasi akuzohen për kontrabandë të mallrave ushqimore, verës dhe karburanteve, ndërkohë që ka nisur hetimi për ‘shpërdorim detyre’ edhe ndaj një doganieri. Mësohet se kontrabanda bëhej në Doganën e Muriqanit dhe të Hanit të Hotit.
Operacioni i koduar “Flaka”, u zhvillua njëkohësisht kontrolle në të dyja këto Pika të Kalimit Kufitar.
Në Han të Hotit u ndalua në flagrancë shtetasi L.V. për veprën penale “Kontrabandë me mallra të tjera”. Mbrëmjen e djeshme, rreth orës 22:10, ky shtetas po transportonte me mjetin e tij, tip “Wolksvagen Golf”, me targë AA175LH, nga Mali i Zi për në Shqipëri, mallra të ndryshme të padeklaruara, kontrabandë.
Lidhur me këtë rast, filloi procedimi penal në gjendje të lirë ndaj shtetasit R.F. me detyrë Doganier i Kontrollit Fizik në Zyrën Doganore Hani i Hotit, për veprën penale “Shpërdorim detyre” pasi nuk ka kryer detyrën, duke lënë shtetasin L.V. të kalojë pa deklaruar mallin që transportonte.
Ndërsa shtetasi Gj.T. u ndalua pasi gjatë kontrollit të bagazheve në doganën e Muriqanit rezultoi se transportonte 114 shishe verë, prodhim italian, të padeklaruara. Ai udhëtonte me autobus nga Mali i Zi në drejtim të Shqipërisë. Materialet në ngarkim të këtij shtetasi i kaluan Prokurorisë për veprën penale “Kontrabandë me mallra që paguhet akcizë”.
Shtetasi Z.S. u ndalua për kontrabandë nafte. Nga kontrolli i ushtruar po në Pikën Kufitare të Muriqanit në mjetin e tij, tip “Benz”, me targë AA936EM, rezultoi se kishte 2 serbatorë, një prej të cilëve i modifikuar për të kontrabanduar naftë.
(Boldnews)
