Pedagogu i gazetarisë, Mark Marku, ishte i ftuar në rubrikën “Opinion” në “News24” ku foli për situatën e rëndë që po përjeton vendi pas tërmetit shkatërrimtar të 26 nëntorit.
Ai kritikoi ashpër qeverinë, ndërsa tha se në terren nuk janë marrë siç duhet masat për të përballuar katastrofën natyrore, e cila për fat të keq la pas 51 persona të vdekur dhe qindra të tjerë të plagosur.
Sipas Markut, pasojat e tërmeti të një jave më parë kanë nxjerrë në pah krimin urbanistik që është bërë në Tiranë dhe Durrës përgjatë tri dekadave.
“Pasojat e tërmeti janë të lidhur me abuzimet që kemi bërë këto 30 vite. Pasojat e mëdha kanë ardhur nga vendimmarrjet politike. Tonet e ngritura nuk justifikojnë asgjë. Kryebashkiakja e Durrësit mendoj se ka pasur presion nga grupet e interesit, të cilët synojnë për të mbuluar krimin. Ky tërmet ka zbuluar krimin urbanistik të kryer në Durrës dhe në Tiranë. Ajo nuk e ka dhënë dorëheqjen për shkak të asaj deklaratës, sepse ishte një lapsus. Ajo mendoj e dha dorëheqjen për të mbuluar gjurmët e krimit. E vërteta po fshihet. Unë shikoj edhe dy anomali që po shfaqen. Përpjekja për të fshehur të vërtetën dhe për të mos informuar qytetarët. Unë e shikoj një arrogancë nga ana e qeverisë, ku qeveria po shfaqet si shoqatë vullnetare. Qeveria nuk është vullnetare, ne duhet të falënderojmë ata që janë vullnetarë me të vërtetë, qeveritarët nuk duan të qajnë as të lotojnë. Nëse qan kryeministri, çfarë duhet të bëjnë ata tjerët. Ata po përhapin frikën. Mund të bjerë luftë nesër, të çmendet dikush dhe të na sulmojë qytetet, çfarë duhet të bëj burri i shtetit, duhet të menaxhojë situatën. Ata janë çorientuar, i ka gjetur të papërgatitur, një pjesë e këtyre dëmeve do ishin më minimale nëse do të ishin marrë masa me 21 shtator. Ka një keq menaxhim dhe po them se ka 6 vjet se ne jemi në këtë zhurmë propagandistike, Kjo qeveri di të bëjë vetëm fjalë për të dalë në televizor. Unë dyshoj se edhe në këtë rast qeveria po merret shumë pak me terrenin”-tha Marku.
I pyetur për ftesën e kryeministrit për opozitën në menaxhimin e fatkeqësisë natyrore, Marku u shpreh: “E ka propagandistike! Nga ana tjetër e fton opozitën. A kemi ne një plan konkret, se si do të përballohet me kosto dhe me grup pune. U bënë shtatë ditë që rri vërdallë, ka përqafuar të gjithë qentë e Tiranës dhe Durrësit. Unë mendoj se të gjithë duhet të bashkohemi për të përballuar këtë gjendje. Tërmeti nuk paralizon demokracinë. Opozitën e do aty që të bëjë foto. Sjellja e Bashës është korrekte. Qeveria po thotë i kemi siguruar qytetarët në hotele me 5 yje”-shtoi Marku.
Gjithashtu ai tha se kjo situatë duhet të ishte menaxhuar më mirë, ndërsa shtoi faktin se krahas operimit në terren duhet të funksiononte paralelisht edhe një strukturë qendrore.
“Unë mendoj, se para duhet të ishte shumë më i organizuar. Të kishte një strukturë qendrore dhe më pas strukturat në terren ku janë problemet. Duhet të kishte një skicë projekt, të mbështetur mbi të dhëna. Rama po kërkon që një krizë të 2019, ta menaxhojë si në kohën e ’79 në komunizëm”-tha Marku.
