Disa dhjetra qytetarë dhe pronarë biznesesh janë organizuar dhe kanë ofruar ambientet dhe banesat e tyre për të strehuar dhe mbuluar të gjitha shpenzimet e të prekurve nga tërmeti i mëngjesit të së martës, i cili ka shkaktuar 29 viktima, ndërkohë që raportohen se shumë qytetarë ndodhen nën rrënoja. Zonat më të prekura nga tërmeti janë në Durrës dhe Thumanë, ndërsa ekipet e emergjencave vijojnë kërkimet.
Belind Këlliçi, kryetar i FRPD-së, përmes një postimi në rrjet shprehet se ka plot shqiptarë, në Shqipëri dhe Kosovë, që duan të ndihmojnë dhe ofrojnë shtëpiat e tyre ose objekte të tjera banimi për strehim.
Grupimi Tirona Fanatics ka njoftuar se ka siguruar banesa në Tiranë, si dhe ushqim, për të prekurit nga tërmeti.
Gjithashtu në një postim nga Lazarati, thuhet se mund të strehohen në këtë zonë mbi 100 familje.
Nismës për të ndihmuar të prekurit nga tërmeti, duke ofruar njësi akomoduese, i janë bashkuar edhe biznese nga qytete të ndryshme të vendit, por edhe nga Kosova.
