Ministrja e Mbrojtjes ka bërë një bilanc lidhur me tërmetin që goditi mëngjesin e sotëm vendin, epiqendra e të cilit ishte në Durrës, ndërsa lëkundja ishte me magnitudë 6.4 të Shkallës Rihter.
Fatkeqësisht nga ky tërmet kanë humbur jetën 7 qytetarë, ndërsa disa qindra të tjerë i janë drejtuar spitaleve në Tiranë, Durrës, Krujë e Kavajë për ndihmë mjekësore.
Olta Xhaçka në një komunikim për mediat i ka drejtuar një thirrje qytetarëve, banesat e të cilëve janë dëmtuar nga tërmeti, të mos qëndrojnë në to.
Po kështu ajo ka kërkuar për të kufizuar në maksimum lëvizjet me makina për ta bërë me të lehtë qarkullimin e mjeteve të emergjencës që nisen drejt zonave të prekura më rëndë, si Durrësi dhe Thumana.
“Forcat zjarrfikëse dhe ekipet e shërbimit shëndetësor nga gjithë qarqet janë nisur drejt Durrësit e Thumanës ku situata është më e rëndë.
E gjithë Forca e Armatosur ka kaluar në gjendje gatishmërie të plotë. Situatë është e rëndë qoftë për numrin e madh të godinave të dëmtuara qoftë edhe për jetët e humbura”, tha Xhaçka.
Operacionet e kërkim shpëtimit vazhdojnë dhe ka ende numër banorësh që mësohet se janë nën rrënoja.
Ajo tha se shteti është në këmbë për përballimin e kësaj situate.
Në fakt kur kanë kaluar rreth 6 orës nga goditja e fortë e tërmetit, nuk ka një bilanc mbi numrin e personave që ndodhen nën rrënoja, sikundër nuk ka një bilanc mbi numrin e banesave të rrezikuara, ndërsa i thuhet qytetarëve të mos qëndrojnë në to. Por si mundet që një qytetar në panik të bëjë vlerësimin nëse banesa e tij është e dëmtuar apo jo? Nëse në terren janë disa qindra forca të policisë, ushtrisë dhe grupeve të emergjencave, në terren duhet të ishin edhe stafet e pushtetit vendor për të vlerësuar të paktën banesat e dëmtuara dhe shkallën e dëmtimit të tyre.
Ndërkohë, që bie në sy fakti i përdorimit të propogandës edhe në një ditë tragjike si kjo e sotmja, ku veç humbjes së jetëve njerëzore dhe të plagosurve, disa mijëra qytetarë janë në panik.
Informacionet po jepen nga ministra apo Kryeministri, të cilët në fakt duhet të shpallin gjendjen e emergjencës.
Nuk dihet pse një vendim i tillë nuk merret, sikundër pse informacionet nuk jepen nga drejtuesit e Emergjencave, Policisë apo Forcave të Armatosura, që ndodhen në terren.
