Ish-deputeti i Partisë Demokratike, Tritan Shehu, thotë se për vitin e ardhshëm nuk është parashikuar asnjë shtesë pagash për sektorin e shëndetësor, duke thelluar diferencën me vendet e Rajonit.
Sipas tij, për PPP-të korruptive, shifra shkon rekord prej 40 milion dollarësh.
“Ndërsa për PPP-të abuzive, korruptive, monopolizuese të sektoreve, apo shkatërrueses të funksionit të institucioneve shëndetësore është parashikuar shifra rekord prej mbi 40 M $.
Në projekt buxhetin për vitin e ardhshëm nuk është parashikuar as shtesa e pagave për të indeksuar inflacionin.
Pra realisht ka vetëm rënie të tyre, duke u thelluar diferenca prej disa herësh qoftë edhe me vendet e Rajonit, midis të cilëve edhe Kosova që vendosi pagën minimale për mjekët 1200 E dhe për infermirët 700 Euro.
Pa asnjë dyshim ky është një nga treguesit e thellimit të varfërisë ekstreme të sistemit tonë shëndetësor, mungesës së çdo stimuli e shpresë pozitive për këtë sektor e punonjësit e tij, një nga shkaqet e braktisjes masive të vendit nga mjekët, infermierët etj.
Dhe nuk mund të ndodhë ndryshe, një sistem në rrënim, i fundit në Europë e afër nivelit afrikano qendror në financimin e tij e nivelin e shërbimit që ofron, gjenerues vetëm i një niveli mizerje financiare për personelin, nuk mund të mos braktiset masivisht.
Pra buxheti i 2020, të cilin do ta analizoj në disa aspekte në ditët në vazhdim, do të jetë veçse buxheti i varfërisë së thellë e i vazhdimit të eksodit masiv të profesionistëve tanë të shëndetësisë, duke arritur shifra të frikshme të mjekëve te ne”, shkruan Shehu.
