Distancohuni nga Edi Rama. Është kjo thirrja që deputeti Lefetr Maliqi i ka drejtuar ligjvënësve të asaj që quhet si “opozita e re”, por edhe kolegëve të tjerë në sallën e Parlamentit.
Kuvendi po zhvillon një situatë të jashtëzakonshme lidhur me situatën e krijuar në Kushtetuese, pas dekretimit nga ana e Presidentit të Marsida Xhaferllarit si anëtare të Kushtetueses.
Maliqi e ka quajtur në shkelje të Kushtetutës lëvizjen e radhës që ka bërë Rilindja, që synon të cilësojë si nul dekretin e Presidentit Meta për të dekretuar si anëtare të Gjykatës Kushtetuese Marsida Xhaferllarin.
Maliqi iu bëri thirrje dhe deputetëve të opozitës së re që të distancohen nga Rama, i cili po synon që të kapë të gjitha institucionet.
Deputeti u shpreh më tej se vendi mund të dalë nga kjo krizë e zgjatur politike vetëm përmes një revolucioni demokratik, ku të bashkohen të gjitha grupet opozitare.
“Me ligj dhe me Kushtetutë thuhet që tre anëtarë të Gjykatës Kushtetuese zgjidhen nga presidenti dhe 3 nga Kuvendi, ky është show i radhës që po bën kjo mazhorancë.
Lartmadhënia nuk mund të gënjejë popullin për gjithë jetën, tha që edhe Enveri të ngrihej shtëpitë nuk do të prisheshin, dhe çfarë po ndodh sot me banorët e Astirit?
Ju doni vetëm babëzinë. Nëse jeni të ndershëm mos vazhdoni të rrini këtu, dhe mos iu shërbeni këtyre, këta thonë që nuk pyesin as për dekret dhe as për ligj (iu drejtohet deputetëve të opozitës).
Unë jam për Unazën e Re, po dëmshpërblimet e banorëve? Kryetar komune kam qenë unë, dhe i kam dëmshpërblyer njerëzit dhe për dy metra kokë që iu kam marrë”, u shpreh Maliqi.
