Këshilli i Lartë i Gjyqësorit ka pezulluar kërkesën e gjyqtarit Guximtar Boçi, i cili kishte kërkuar rikthimin në detyrë, pasi u shkarkua në vitin 2016 nga KLD për shkak të një video-skandali të publikuar.
Ish-gjyqtari Boçi ka drejtuar kërkesa në mënyrë të përsëritur në KLD prej 09.06.2017 e në vazhdim duke kërkuar rikthimin në detyrë, por kërkesa e tij nuk janë marrë në shqyrtim.
Kërkesa e parë është drejtuar në datën 9 qershor 2017, ndërsa kërkesa e fundit që i drejtohet organit të ri KLGJ mban datën 20 dhjetor 2018, shkruan BW.
Gjyqtari Boçi u shpall i pafajshëm nga Gjykata e Apelit në Vlorë lidhur me akuzat dhe prej atëherë kërkon rikthimin në detyrë.
“Këshilli vendosi pezullimin e shqyrtimit të kërkesave të paraqitura nga gjyqtari Guximtar Boçi, për rikthimin e tij në funksionin e kryetarit të Gjykatës së Rrethit Gjyqësor Gjirokastër dhe në detyrën e gjyqtarit për shkak se kërkesat janë për shqyrtim para Gjykatës Administrative të Apelit.
Në vijim të mbledhjes, Këshilli vendosi rrefuzimin e kërkesës së z. Tunxh Vatnikaj, për kthimin në funksionin e gjyqtarit. Gjithashtu, Këshilli miratoi verifikimin e kushteve dhe kritereve ligjore për rekrutimin si gjyqtar të kandidatit z. Ligoraq Toshi”, thuhet në njoftimin zyrtar.
