Deputeti Ben Blushi e ka ngritur zërin në Kuvend kundër të dyja palëve: Të majtëve dhe të djathtëve duke i akuzuar se po bëjnë një reformë drejtësie hermetike që nuk kuptohet nga populli shqiptar, që është si e koduar dhe që edhe nëse palët nesër bëjnë kompromis, asnjëra prej tyre nuk përfaqëson të varfrit.
Socialisti i ka provokuar të vetët, duke iu drejtuar kreut të komisionit Fatmir Xhafaj: “Hajde t’ia kthejmë Presidentin popullit. Ka të drejtë ta zgjedhë!”
Blushi tha: “Unë nuk jam i bindur sot nëse po i afrohemi apo jo reformës në drejtësi, po ne po kërkojmë konsensus me palën minoritare dhe nuk po gjejmë konsensus me palën mazhoritare! Pandi, me të varfrit, me ata që rropaten çdo ditë. Absolutisht s’po i pyesim ata.
Edhe nëse këtu do gjendet konsensus, dy palë që bëjnë një palë gjejnë interes për interesat e përbashkët, por këto janë palë që përfaqësojnë të pasurit e Shqipërisë.
Kush i përfaqëson të varfrit?! Rilindja?! – Asnjë ditë s’i ka përfaqësuar.
Po të dhunuarit? PD-ja?! – Asnjë ditë s’i ka përfaqësuar.
Populli shqiptar nuk po pyetet, interesat e tij nuk janë përfaqësuar asnjë ditë. Produkti do të jetë një produkt i panjohur burokratik për shumicën e shqiptarëve. Në 18 muaj askush nuk u përpoq t’ia shpjegonte shqiptarëve çfarë është Reforma në Drejtësi? Pse dhe ku ndryshon struktura e re nga e vjetra?
Çfarë janë këto kode, i di njeri? BKH?! Pyesni 90% të shqiptarëve çfarë domethënë KLP, KLGJ, SPAK etj. A e dinë shqiptarët ç’janë këto?!
Unë them që nuk i dinë Fatmir, sepse keni bërë një proces hermetik. Kjo reformë nuk do të ndihmojë të varfërit.
Kush po i pyet shqiptarët? Shqiptarët nuk dinë absolutisht asnjë gjë. Duket si një burokraci, këtë po ndërtoni ju. Kësaj klase politike i mungon themelorja, nevoja për të pyetur popullin. Kurrë në 25 vjet nuk e ka pyetur popullin shqiptar çfarë do.
Hajde t’ia kthejmë Presidentin popullit. Ka të drejtë ta zgjedhë. E bëjnë serbët, malazezët, e bëjnë kroatët. Popullit shqiptar i lihet vetëm një e drejtë, të zgjedhë partitë, kurse partitë të zgjedhin të gjithë. Unë kolegen time Mimoza Hafizi do të sjellim një amendament që presidenti të zgjidhet nga popullit siç e kam propozuar edhe më parë.”
