Nuk ka zgjatur më shumë se 90 minuta mbledhja e kryesisë së PS-së, në të cilën është vendosur që kandidatët për kryebashkiakë dhe këshilltarë të zyrtarizohen të shtunën, 11 maj.
Kryeministri Edi Rama, njëherazi kryetar i PS-së, ka deklaruar se gjatë ditës së premte do të ketë takime me të deleguarit dhe grupet e punës, për të konkluduar më pas në emrat përfundimtar që do të garojnë nën siglën e socialistëve dhe koalicionit të udhëhequr prej tyre “Aleanca për Shqipërinë Europiane”.
Rama ka ripërsëritur se zgjedhjet e 30 qershorit do të mbahen në 61 bashkitë e vendit, duke shtuar se në të gjitha rastet do të zbatohet ligji.
“Do të konsolidojmë të gjithë listën e kandidatëve për kryebashkiakë dhe kandidatët për këshillat bashkiakë. Të premten do zhvillojmë takime me të deleguarit e PS nëpër qarqe, ndërsa të shtunën do të vendosim për kandidatët e kryetarëve të bashkive. Në 30 qershor do të kërkojmë votën e qytetarëve në 61 bashkitë për të marrë besimin e tyre për katër vitet e ardhshme”, tha Rama.
Kreu socialist ka ironizuar edhe qëndrimin e PD dhe LSI për të mos marrë pjesë në zgjedhje, ndërsa e cilësoi si rrugë pa krye atë që kanë zgjedhur këto forca politike.
“Duhen gjëra të mëdha që unë të mërzitëm, por jam i keqardhur që Pd dhe simotra e vogël LSI ks vendosur të shkojë në një rrugë pa krye”, theksoi Rama, duke iu përgjigjur pyetjes nëse është mërzitur që në 30 qershor nuk do të ketë përballë opozitën.
Rama nuk dha një përgjigje të prerë nëse do të ketë negociata mes palëve në pozitë dhe qeveri për të zgjidhur krizën, ndërsa theksoi se “ndërkombëtarët kanë thënë që kriza u takon palëve. Palët kanë vendosur. Në raport me të të nuk ndodh asgjë”.
Ndërkohë duke iu përgjigjur pyetjes se nën siglën e kujt do të kandidojnë kandidatët e PS-së, Rama sqaroi se ata do të jenë të koalicionit.
“Në garë dhe në demokraci hyjmë për të fituar. Nuk udhëhiqesh nga frika e atij që ke përballë. PS nuk bën regjistrime subjektesh, këtë çështje e përcakton ligji zgjedhor që në krye të vet ka KQZ.
Jemi në 2019, 2017 është histori. Në 2017 kemi bërë një përpjekje të jashtëzakonshme të njëanëshme të udhëhequr nga unë. Kam bërë sasinë më të madhe të lutjeve, sot jemi në kushtet që kemi një përgjegjësi. Ti japim shqiptarëve kandidatët”, tha Rama.
