Arbitrazhi i kërkon qeverisë shqiptare “të ndërmarrë të gjitha veprimet e nevojshme për të pezulluar” procedurat e ekstradimit në Londër kundër Francesco Becchetti-t, pronarit të Agon Channel si edhe administratorit Mauro De Renzis.
Vendimi është marrë nga Qendra Ndërkombëtare për Zgjidhjen e Mosmarrëveshjeve me seli pranë Bankës Botërore në Uashington DC.
Sipas vendimit, trupa e Gjykatës së Arbitrazhit, rekomandon gjithashtu që Shqipëria të pezullojë procedurat vijuese penale kundër Paditësve të kësaj çështjeje dhe që të dyja palët të arrijnë në një marrëveshje mbi ruajtjen e aseteve te Paditësit, që kanë qenë të sekuestruara nga shteti Shqiptar, përgjatë gjithë kohëzgjatjes së arbitrazhit.
Në deklaratën e publikuar sot në mëngjes në faqen zyrtare të klubit thuhet se “Qendra Ndërkombëtare e Bankës Botërore për Zgjidhjen e Mosmarrëveshjeve të Investimeve (ICSID) vendos se Shqipëria duhet të pezullojë ekstradimin dhe procedurën penale kundër pronarit të Leyton Orient Football Club”.
Vendimi u lëshua një muaj pas seancës dëgjimore mbi masat e sigurimit të padisë, ndërsa Gjykata e Arbitrazhit vuri në dukje se “çdo ndalim i procesit të hetimit ose procedimit ndaj një sjelljeje që në mënyrë të arsyeshme dyshohet të jetë me natyrë kriminale, mund të vendoset vetëm kur është absolutisht e nevojshme” dhe konfirmon se “jemi pikërisht përpara këtij rasti”.
Paditësit, në arbitrazh argumentuan se , si kundërpërgjigje ndaj kërkimit të së drejtës së tyre në arbitrazh, Shteti Shqiptar vazhdoi të lançonte një sërë hetimesh tatimore “të pathemelta dhe abuzive” kundrejt tyre dhe investimeve të tyre vendase, sekuestruan asetet e tyre në Shqipëri dhe lëshuan urdhëra arresti kundër Francesco Becchettit dhe Mauro De Renzis, duke kërkuar ekstradimin e tyre nga Mbretëria e Bashkuar.
Arbitrazhi Ndërkombëtar rekomandon gjithashtu që Shqipëria të pezullojë procedurat vijuese penale kundër Paditësve të kësaj çështjeje dhe që të dyja palët të arrijnë në një marrëveshje mbi ruajtjen e aseteve te Paditësit, të sekuestruara, përgjatë gjithë kohëzgjatjes së arbitrazhit.
Qendra Ndërkombëtare për Zgjidhjen e Mosmarrëveshjeve për Investimet është një institucion arbitrazhi që merret me zgjidhjen dhe pajtimin e mosmarrëveshjeve mes investitorëve ndërkombëtarë. ajo është anëtare e Grupit të Bankës Botërore, nga e cila financohet, ndërsa në të janë anëtarësuar 158 shtete përfshi edhe Shqipërinë.
(Boldnews)
