Kreu demokrat Lulzim Basha ka mbledhur sot Këshillin e Kryetarëve lidhur me strategjinë që do të ndjekë në vijim opozita. Ashtu si Këshilli Kombëtar, edhe Këshilli i Kryetarëve ka vendosur që protesta e rradhës së opozitës të mbahet më 11 maj, ora 18:30 para godinës së Kryeministrisë.
Ndërkohë mësohet se gjatë fjalës së tij, kreu demokrat Lulzim Basha ka deklaruar se zgjedhjet pa opozitën janë një farsë.
Basha u shpreh se opozita është e vendosur për të mos lejuar që zgjedhjet t’i organizojë dhe diktojë krimi i organizuar.
Në këtë kuadër, mësohet se ai ka përmendur kryeministrin Edi Rama, ish-ministrin Damian Gjiknuri dhe kryebashkiakun e Durrësit, Vangjush Dako, si dhunuesit dhe tjetërsuesit e votave të shqiptarëve. Opozita ka deklaruar se Gjiknuri dhe Dako janë kapur në biseda me përfaqësues të krimit për tjetërsimin dhe manipulimin e votave, përmes blerjes së tyre.
Basha ka deklaruar se largimi i Edi Ramës është vetëm hapi i parë për zgjidhjen e krizës politike në vend, ndërsa ka vënë theksin në vijimin e aksionit opozitar.
Gjithashtu është vendosur që nga kjo e enjte të ketë protesta rajonale, që do të synojnë bllokimin e akseve rrugore kryesore.
https://boldnews.al/2019/04/22/strategjia-bllokimi-i-zgjedhjeve-te-30-qershorit-ja-nje-nga-skenaret-qe-mund-te-aplikohet/
