Edi Rama çoi në Parlament në vitin 2013, 19 kriminelë, ndërkohë që në krye të bashkive kishte përdhunues.
Kështu u shpreh Lulzim Basha, kreu i PD-së, mbrëmjen e sotme në emisionin ‘Tempora’, duke shtuar se protestat jo vetëm që ia kanë arritur qëllimit, por kanë kthyer peisazhin në Shqipëri, kanë kthyer shpresën te qytetarët se s’do të kemi më një shtet fallso, që s’do të kemi të gjithëpushtetshëm që nuk i hyn gjemb në këmbë, dhe qytetarët e thjeshtë shkojnë në burg për mospagim dritash.
“Deputetët s’mund t’i emërojnë Avdylajt apo Niçet. Jam i hapur për të diskutuar për çdo lloj sistemi, kam si preferencë sistemin mazhoritar me 100 deputetë”, theksoi Basha, ndërsa shtoi se problem kryesor është se kush do të diktojë, krimi apo qytetarët.
“Nuk ka pikë rëndësie sistemi, nëse deputetët i cakton krimi. Nëse nuk ndëshkohen ata që janë kapur në flagrancë me krimin, atëherë s’ka rëndësi sistemi.
Damian Gjiknuri është kapur me Ymer Lalën, një kriminel. Dako është kapur me Niçet dhe Avdylajt, Taulant Balla është kapur me Edmond Begon.
Janë kapur kriminelët duke folur me politikanët, për mbushjen e kutive të votave”, tha Basha.
Sipas tij, nëse do të ketë një zgjidhje politike, patjetër që do të përfshihet Partia Socialiste, por kushti i panegociueshëm është largimi i Edi Ramës.
“Rama ka përgjegjësinë kryesore për këtë gjendje, duhet një qeveri tranzitore dhe një pakt kombëtar për rregulla loje europiane”, tha Basha. Sipas tij, këto rregulla loje do të pamundësojnë diktatin e krimit dhe oligarkëve në zgjedhje.
