Pas takimit në Rrogozhinë, kreu demokrat Lulzim Basha është ndalur në një takim me fermerët në Luz të Kavajës.
Basha tha se askush nuk mund të ndërpresë rrugëtimin e shqiptarëve drejt Europës.
“Rruga jonë drejt Europës ka qenë e mbushur me sakrifica dhe dhimbje, por ia ka vlejtur. Kemi qenë në varfëri afrikane në regjimin gjakatar të Enver Hoxhës.
Rruga jonë drejt Europës nuk ka përfunduar. Ndryshimi i vetëm mes Shqipërisë dhe vendeve të Europës, është vetëm një, se ne kemi një klasë politike që e ka vjedhur këtë vend, që është bërë njish me krimin dhe oligarkët”, tha Basha.
Sipas tij, asgjesuan Gjykatën Kushtetuese që të kalojnë vendim pas vendimi, grabitjen e pronave të shqiptarëve.
“Politikanët e kapur në bashkëpunim me krimin për të vjedhur pronat e shqiptarëve dhe votat e tyre do të shkojnë në burg.
Miqtë tanë europianë e dinë shumë mirë se në Europë nuk shkohet me gënjeshtra, por shkohet me vlera, me punë dhe me të vërteta.
Ndaj jemi në rrugën e mbarë, e kemi nisur në 16 shkurt dhe më pas morëm vendimin historic për të dorëzuar mandatet e deputetëve dhe shpëtuam demokracinë shqiptare nga asgjesimi”, tha Basha, duke shtuar se u kapën gjykatat, u kap prokuroria, parlamenti u kthye në një noter të Kryeministrit, dhe të vetmit që nuk u kapën dot ishin deputetët e opozitës dhe opozita në tërësi.
