Policia e Shtetit ka vijuar operacionin e koduar “Fati i Lojërave”, pas informacioneve të siguruara nga strukturat qendrore të saj, për goditjen e aktivitetit të paligjshëm të lojërave të fatit.
Gjatë kontrolleve në qytetin e Kavajës, në lagjen nr. 1 dhe lagjen nr. 6, janë zbuluar dy ambiente të përshtatura për këtë veprimtari, ku ishin vendosur makina për lojëra fati.
Në total janë sekuestruar 16 makina që përdoreshin për lojëra të paligjshme.
Në lidhje me rastin janë shpallur në kërkim dy shtetas, 26 dhe 20 vjeç, të cilët kishin marrë me qira ambientet ku ushtronte aktiviteti i paligjshëm. Në njërin ambient janë gjetur 5 makina, ndërsa në tjetrin 11.
Policia bën të ditur se po vijon puna për kapjen e tyre dhe për dokumentimin e plotë të aktivitetit.
Materialet i janë kaluar Prokurorisë së Durrësit për veprime të mëtejshme, ndërsa policia vijon kontrollet në terren për goditjen e lojërave të fatit të paligjshme.
