Socialistë dhe progresistë, iu drejtua Elisa Spiropali, pjesëmarrësve në Kongresin e PS-së, që e quajti këtë parti si mbjellësen e paqes në vend.
Spiropali u kujdes të përshëndeste ikonat dhe Rilindasit e PS-së, edhe pse lideri historik i socialistëve, Fatos Nano, refuzoi pjesëmarrjen në këtë Kongres.
Nuk dihet se cilat ikona të PS-së ishin në Kongres, kur pjesa më e madhe e atyre që drejtuan këtë forcë politike, në ditët më të vështira të saj, sot nuk janë më pjesë të socialistëve apo progresistëve.
Fatos Nano, Namik Dokle, Arta Dade, Arben Malaj, Elmaz Sherifi, Kastriot Islami, Marko Bello, e shumë të tjerë, u larguan nga PS e drejtuar nga Edi Rama, ndërsa u zëvendësuan me të tjerë emra që vinin nga rradhët e Mjaft të drejtuar nga Veliaj, apo G 99.
Spiropali ashtu sikundër pritej tha se PS me Edi Ramën nuk u tutën, po vazhduan përpara.
“Edi Rama dhe PS janë ideatorët e kësaj platforme që i duhet Shqipërisë. Në rrugën tonë drejt Europës ne shqiptarët kurrë nuk kemi pasur një kundërshtar më të forta se vetja.
Respekt për ata që protestojnë sepse janë të varfër, sepse nuk e ndjejnë dorën e shtetit. Por ata që për interesa të ngushta braktisin detyrën, nuk kanë asnjë lidhje për interesin e Shqipërisë dhe shqiptarëve”, tha Spiropali, duke shtuar se “ata thonë hiqni Edi Ramën se nuk fitojmë sot, por unë u them: o të keqkutuar pushteti nuk merret në tavolinë, por me votë. Ju presim në betejën e 2021, kur ne me Edi Ramën në krye do të fitojmë sërisht”.
